धनगढी, फाल्गुन ८/ कैलालीको गौरीगंगा नगरपालिका ५ अन्डैयास्थित एक स्थानीय किसानको केरा बारीमा बाघ देखिएको छ।
अन्डैयास्थित स्थानीय टीकाराम चौधरी र सुरज चौधरीको केराबारीमा शनिबार विहान साढे ४ बजे बाघ पसेको छ। किसान टीकाराम चौधरीले घर सँगै जोडिएको आफ्नै केराबारीमा बाघ आएको र विहानैदेखि गर्जिन थालेको जानकारी दिए। घरबाहिर निस्कन पनि त्रास फैलिएको बताउँदै उनले केही दिन यता अन्डैया क्षेत्रमा दिनहुँ देखिदै आएको बताए।
फागुन ३ गते अन्डैयाकी २५ वर्षीया कला धामीमाथि आक्रमण गरि बाघले ज्यान लिएको थियो। भने ३० गते जिल्लाको कैलारी गाउँपालिका ८ दुधियाका २८ वर्षीय दुर्गा चौधरीलाई स्थानीय सीता कुँवा सामुदायिक वनमा विहेको लागि पात टिप्न गएको बेला आक्रमण गरि घाइते बनाएको थियो।
पछिल्लो २ साता यता कैलालीको गौरीगंगा नगरपालिका र कैलारी गाउँपालिकास्थित सामुदायिक वनमा बाघ देखिदै आएको छ। नरभक्षी बाघ नियन्त्रणको लागि वन र स्थानीय प्रशासनले प्रयास थालेपनि अझैसम्म नियन्त्रण भने गर्न नसकेको हो।
भारतको दुधुवा नेश्नल पार्क सँग जोडिएको वसन्ता कोरीडोरस्थित ती सामुदायिक वनमा एक भन्दा बढी बाघ देखिएको बताइएको छ।
