जीत ट्रासन
नुन खाएपछि
नुन खाएपछि
धेरैथोकमा फरक पर्दोरहेछ ।
नुन चाटेपछि
मेरा बुलन्द कविताले
मालिकको तलुवा कैलाश भन्न थालेछ ।
ख्वामित् को भजन गाउन लागेछ।
शासकका दमनका विरुद्ध
सडकमा राँको बालेर गर्जने
मेरा बुलन्द कविताले
नुन पाएपछि
एकाएक गुलाम बन्न पुगेछ ।
नुन चाखेपछि
मेरा बुलन्द कविताले
सरकारको स्वेच्छाचारलाई
मलमली उपहार भन्न लागेछ
दरबारको तलवारलाई
मखमली फूलहार देख्न थालेछ ।
नुन खाएपछि
धेरैथोकमा फरक पर्दोरहेछ ।
