लेखक: गणेश वर्तमान
“कहोँर जाइटि वर्तमान जि?” एक्ठो अठार बर्सक लौर्या महि बोल्कर्लि! मै ओराली बजार पुगल रनहुँ!टब्बहँ कैयाकुचिल अन्ढर्या राट रह!बिन लाइट बर्ल हेर्लसे आपन अङ्गरिफे निचिन्मिल! मनैठेसे लेक जनावर टक सब्ज ड्यारा टेक्स्याकल रलह काहुँ टब्सम!उहमार उहाँक माहोल एकडम भाँईभाँई लाग्टह!ओत्रा कैँयाकुचिल अन्ढार म फेे हुँकाहार अन्ह्वाँर ढौवरिक जोन्ह्याँ असक चम्कटलहिन्!
“अप्नहन कहोरे ड्याखलअस लागल!”सम्झटि कनु!
टब झ्वाट्ट डिमागिम आइल फेेसबुक म डेख्लक फोटुु!
“अप्न नबिना हुइटि ना?”उ लौर्या बोल्नासे आगहँ मै बोल्ढर्नु! मै ओत्रा बाट कहबेर नबिनक एकडम लग्गु होस्याकल रनहुँ! चुुरिन्यनके बट्कोहि समझ्क डरफे लाग्टह डानडान!टभुन फेेसबुक म कुसडिनसे भाइरल हुइल डेख्क बोल्नास मनफे लाग्टह नस्से!
“हो,कसिक चिन्ह्लि जे अप्न?”एकघनि म्वार उहँर मुँ कैख बोल्लि! हम्र बन्वँमसे निकर्क रसरस ओराली बजार पुग्टलहि!
“अप्न ट कुस् डिनसे न भाइरल बाटि फेेसबुक म!”ओत्र बोल्नु मै ओहिँसे आग बोल्ना वाक्य बन्स्याकल रह बन्ना ट!हुकहिन म्वाँ बाट असर निकर्लिन् या और कारण ! उ बाटसे गाँठिगुठि निमिल्ना बाट कलि!
“अप्नहन अक्कले बन्वँम न्याङ्बेर डर निलागठ?”टब मै हँस्टि हलि हलि कनु!
“अप्नक सङ न्याङ्गबेर का डर!तर महि अक्कल रहल म फे ओत्रा डर निलागठ! क्याक डर डरिना मै!”कनु टबसम हम्र ओराली बजार पुग्स्याकल रलहि!
“अप्न निडर जिन् बन्बि वर्तमान जि?”कहल टब मै कनु
“काजे?”
“काजेकि निडर थारु यिहाँ नबिना बन्ठ!रेशम बन्ठ!सत्ता हुँकनक हाँठम बाटन!किऊ बिरोध कर्टि कि बन्दुकिले डाक्डेठ!”नबिना अत्रा बाट कहबेर हुँकाहार आँखिमसे आँश बहटलहिन भल्भल-भल्भल!
“कैडिन सहके बैस्ना हो नबिना जि?”मै यि बाट कहबेर नबिना आँश प्वास्टलहि गडौरिलेक!
“वर्तमान जि हुइना ट मै डान्चे कलास म पह्रु तर म्वार लक्ष्य भार रह!थारु जातन उँप्पर हुइना सरकारके अत्याचारके बिरुढ्म लर्ना!निडेख्ठो आस म्वार हाल का हुइल!”
न भाबुक होक कहटलहि!साइट रातभर भाँँईभाँई-भाँईभाँई यिहँर उहँर कर्लक झार हुहिन नबिना पिचरोडिम बैस्गिलि!टब मै फे हुकाहार लग्गु बैस्नु!टब आग मै कनु!
“नबिना जि ,बघ्व नियन्त्रण कर कैक अवाज उठाइबेर सरकार बन्ढुक डागल टुहाँर छाटिम!हम्र थाारु डेख्टि बाटि!यि नश्लबादि सरकार वाकर म्वाल एकडिन चुुकैने बाट् जरुर!”टब नबिन खेै का हुइलिन!एक्लाग् रिस्साक ब्वाल लग्लि!
“किऊ कुस निउँखर्ने हो वर्तमान जि यि सरकारके!हमहिन फुुटाक राज कर्टा सरकार !थारु कब्बु एक्क निहुइ सेकहिँ!”ओत्रा बाट कहबेर हुँकाहार जिउ लग्लगाइ टलहिन साइट रिसलेक हुहिन !टब मै कनु
“बाट ओसिन निहो नबिना जि ,रामजनम योगेन्द्र रुक्मणिठेसे लेेक भानुरामहुँक्र ,डा गोपाल दहित विजय गच्छदार हुँक्र सक्कु ज थाारुन्हँक हकहितक लाक एक ठाउँ अइना हो कलसे सम्भव बा !उ माहोल बन्टाफे!”म्वार बाट चामचिम रैक ओनइलि व कलि!
“आस्काल्हिक थारु बाघ जस्ट हुइट वर्तमान जि,मिलहिँ कलसे हिकनक राज चलहिन बन्वँम तर बाघन कब्बु एक्क ठाउँ बैसल ड्याखल बाटि?”नबिनक बाट सुन्कफे निसुनल भ्या्क चामचिम पल्रनु!काजेकि नबिनक बाटहन जिट्ना म्वारठे कौनो तर्क निरह!
