हसुलिया ११ भदौ । बाढसे पुहाइल कटैनीके काठे पुल निर्माणमे स्थानीय जुटल बाटै । कैलारी गाउँपालिका–७, छटकपुर बसन्ता स्थित कटैनी लडियाके काठे पुल बाढसे पुहाइल पुल छटकपुरके स्थानीय पुल निर्माणमे जुटल हुइट ।
बाढसे महत्वपूर्ण कृषि सडकके काठे पुल भत्काइलपाछे स्थानीयवासीहे ओहोरदोहोर कैना समस्या हुइल बा । पुल बाढसे पुहाइलपाछे स्थानीयहुक्रे जोखिम मोलके ओहोरदोहोर कैना बाध्य हुइल बाटै ।
सामुदायिक बनुवासे कठ्वा उपलब्ध कराइलपाछे उहाँहुक्रे जनश्रमदान मार्फत पुल बनाइ जुटल गाउँक भलमन्सा जीया चौधरी जानकारी डेलै । गैल असार ११ गते आइल बाढसे उ पुल भत्काइल हो ।
ओस्टके गैल असार ११ गते आइल बाढसे पुहाइल रामपुर स्थित कटैनी लडियाके काठे पुल फेन स्थानीयहुक्रे निर्माणमे जुटल बाटै ।
बाढसे काठे पुल भत्काइलपाछे जोखिम मोलके खेट्वामे जैना बाध्य रहल रामपुर गाउँके स्थानीय तथा गाउँक भलमन्सा रामलाल चौधरी बटैलै । ओहकान अनुसार ओहोरदोहोरके लाग रामपुर, भुईयाँफाँटा, तिघरीके स्थानीय मिलके बनाइल काठे पुल भत्कलपाछे उ तीन गाउँवासीहे सबसे ढिउर समस्या झेले परल बा ।
पुल भत्कलपाछे स्थानीयहुक्रे ट्रयाक्टर, डल्लप लगायतके कृषि साधन लेके खेट्वासम अइना जैनाके लाग वडा नम्बर ५ स्थित पवेरा मन्दी हुइटी तीन÷चार घण्टाके यात्रा करे परल बा ।
स्थानीय सामुदायिक बनुवासे कठ्वा उपलब्ध कराइ पाछे रामपुर, भुँइयाँफाँटा ओ तिघरी गाउँक स्थानीय जनश्रमदान मार्फत पुल निर्माणमे जुटल बाटै । गाउँपालिकासे फेन पुल मर्मतके लाग कुछ रकम विनियोजन करडेहल भलमन्सा चौधरी जानकारी डेलै ।
