हसुलिया, १३ कार्तिक । कैलाली जिल्लाके कैलारी गाउँपालिकामे ढकिया, डेलुवा ओ बास्केट बिन्ना तालिम सम्पन्न हुइल बा ।
कैलारी गाउँपालिका महिला तथा बालबालिका शाखाके आयोजना ओ पारदर्शि महिला विकास बहुउद्देश्यीय सहकारी संस्था लिमिटेड हसुलिया, कल्प सस्थाके सहकार्यमे थारु महिलाहुकनके लाग हुइल १५ दिने ढकिया, डालो ओ बास्केट बिन्ना तालिमके समापन कैलारी गाउँपालिकाके उपाध्यक्ष भगवतीकुमारी चौधरी करल रहिट ।
उदघाटन कार्यक्रममे बोल्टी उहाँ ढकिया बिन्ना थारु समुदायके पहिलेक सीप रहल मने यी तालिममे महिलाहुकनके ठप टमान मेरिक चिज बनैना सिख्ना अवसर मिलल बटैली । ढकिया बनाईबेर थारु संस्कृतिसे जोरल ओ डालो ओ बास्केटफे सिख्ना अवसर मिलल ओरसे तालिम लेके व्यावसायिकता ओर लैजाई पर्नामे उहाँ जोर डेहल रहिट । उहाँ कहली, ‘ढकिया, डालो ओ बास्केटके लोकप्रियता बह्रटी गैल ओरसे निरन्तर रुपमे बनाई सेक्लेसे आर्थिक स्रोतमे बृद्धि करे सेक्जाई ।’
पुङजा, मुङजा, बाँस लगायत घाँससे बनल ओरसे स्वास्थ्यके लाग बहुट मजा रहल उपाध्यक्ष बटैली । बजारमे मिल्ना प्लाष्टिक वस्तुसे मानव स्वास्थ्यके लाग हानिकारण रहल मने पुङजा, मुङजासे बनल बस्तु वातावरणमैत्री रहल उहाँ बटैली । प्लाष्टिक भाडा आइलपाछे ढकिया, छिटवा, छिटरलयागत विस्थापित हुइल उपाध्यक्ष बटैली ।
पुङजा, मुङजा, बाँस लगायत घाँससे बन्ना बस्तुहे प्रवद्र्धन कैना जरुरी बा । गाउँपालिकासे मुङजा उत्पादनके लाग बजेटफे विनियोजना कैना उपाध्यक्ष बटैली ।
कार्यक्रममे कैलारी गाउँपालिका वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी ढकिया, डेलुवा ओ बास्केट बिन्ना तालिमसे महिलाहुकनके आर्थिक रुपमे आत्मनिर्भर बन्ना सहयोग पुग्ना बटैलै ।
१५ दिने ढकिया, डेलुवा ओ बास्केट बिन्ना तालिममे १८ जाने थारु महिलाहुँक्रनके सहभागिता रहल रहे । कार्यक्रमके संचालन कैलारी गाउँपालिकाके महिला तथा बालबालिका शाखा प्रमुख बालकुमारी चौधरी करल रहिट । उ ढकिया, डालो ओ बास्केट बिने सिखैना काम प्रशिक्षण करिश्मा चौधरीसे करल रहिट । तालिम समापन कार्यक्रममे कल्प सस्थाके मेनेजिङ डाइरेक्टर प्रकृति ढुङगेल उत्पादित बस्तुके बजारीकरणबारे जानकारी डेहल रहिट । निसराउमसे
