थारु भासाके लावा डग्गर त्रैमासिकके १६औं ओ थारु साहित्य–संस्कृति प्रतिष्ठानके टिस्रा बार्षिकोत्सव सँगसँगे निम्जल बा ।
दाङदेउखर लमहीमे कुँवार १७ गते हुइल बार्षिकोत्सवके अवसरमे साहित्यकार शत्रुघन चौधरी १५ हजार राशीके लावा डग्गर साहित्यिक पुरस्कारसे पुरस्कृत, सम्मानित हुइलाँ । पुरस्कारले अपनहे थारु भासा, साहित्यके लेखनमे थप जिम्मेवार बनाइल उहाँ कहलाँ ।
शत्रुघन चौधरी थारु प्रतिनिधि कथा–१, अस्टिम्कीक गीत, बिहान, डौना बेबरी पत्रिकाके संकलन, लेखन, सम्पादन कर्ले बटाँ । उहाँ थारु भासा पृष्ठके सहसंयोजक रहिट, अब्बे नेपाल प्रज्ञा प्रतिष्ठानके अनुवाद विभाग सदस्य बटाँ ।
कार्यक्रमके बर्का पहुना प्राज्ञ डा कृष्णराज सर्वहारी लावा डग्गर पत्रिकाके बिक्री बिटरन समस्याले, देश विदेशसम जोरक लग इहि कुँवार १७ गतेसे साहित्यिक अनलाइन औपचारिक रुपमे सुरु हुइल जनैलाँ ।
नारायण योगी देउखरके कुमाल समुदाय बारेम् फेन लावा डग्गर बिसय बस्टु उठान करे पर्ना अर्जि कर्ला । बालगोविन्द चौधरी सुर्खेतसे डौना बेबरी पत्रिका सम्पादनमे अपन सँगसँगे रलक शत्रुघन चौधरीहे लावा डग्गर सम्मान कैके मजा काम करल बटैलाँ । पत्रकार दशरथ घिमिरे थारु भासा, साहित्य जोेगैनामे लावा डग्गरके बरवार योगदान रहल ढारना रख्लाँ ।
ओस्टक रेशम बिसी जसिक बोल्ना, ओस्टे लिख्ना अभ्यास लावा डग्गरमे मजा बा कहलाँ । बसन्तप्रकाश चौधरीके लावा डग्गर पत्रिका थारु साहित्य लेखनमे पुँछि अइँठ्ना काम कइलक बट्वइलाँ । धर्मराज बैरागी भुमिपुत्र थारुन्के पहिचान बँचाइक लग थारु पाठ्यक्रम लागु करे पर्ना बटैलाँ ।
शिक्षक भाष्करदेव चौधरी कहलाँ, मस्टरवा रलक कारन स्थानीय बिसयअन्तर्गत स्कुलिम बहला, माँगर गीत सिखैठुँ । समयअनुसार थारु समुदायमे फेन परिवर्तन हुइटि बा, जेएनजी पुस्ता थारु भासा बोलक् नै चहठाँ । समयके आवाज बोकल चिज साहित्यमे अइना चाहि । लावा डग्गरके बिक्री बिटरन सहज होए कना उहाँक् कहाइ रहिन् ।
शिवहरि चौधरी अइसिन कार्यक्रममे महिला साहित्यकारके उपस्थिति जरुरि रहल बटैलाँ । यम चौधरी जेएनजी पुस्ताके लग अनलाइन जरुरि रहलमे लावा डग्गर अनलाइनमे सुरु हुइलमे फोहि लागल बटैलाँ ।
कार्यक्रममे साहित्यकार निमबहादुर थापा, गुरुप्रसाद कुमाल बुलबुल, रामप्रकाश चौधरी, विजय चौधरी, हरि पोख्रेललगायत बोलुइयन आ आपन सुभकाकमना डेले रहिट ।
लावा डग्गर त्रैमासिकके प्रधानसम्पादक छविलाल कोपिलाके घरगोस्याइमे हुइल कार्यक्रममे प्रकाशक टिकाराम चौधरी धन्यवाद डेले रहिट ।
