टीकापुर। कैलालीमा “टीकापुर साहित्य महोत्सव–२०८२” सफलतापूर्वक सम्पन्न भएको छ। यो महोत्सव चैत १३ गतेदेखि सुरु भएर १५ गतेसम्म तीन दिन चलेको थियो।
यस महोत्सवमा भाषा, साहित्य, कला, संस्कृति र समाजका विभिन्न विषयहरूलाई एउटै ठाउँमा समेटिएको थियो। आयोजकका अनुसार यो कार्यक्रम क्षेत्रीय मात्र नभई राष्ट्रिय स्तरको महत्वपूर्ण साहित्यिक तथा सांस्कृतिक उत्सव बनेको छ।
यस वर्षको महोत्सव “थारू साहित्य तथा संस्कृति” मा केन्द्रित थियो। थारू समुदायको भाषा, परम्परा, संस्कृति र जीवनशैलीलाई सबैसामु चिनाउने उद्देश्य राखिएको थियो।
महोत्सवमा २१ वटा विभिन्न सत्रहरू सञ्चालन गरिएका थिए। यसमा देशका विभिन्न क्षेत्रका विज्ञ, लेखक, कलाकार र समाजसेवीहरूको सहभागिता थियो।
कार्यक्रममा कर्णाली नदीमा जलविहार, थारू नृत्य, सडक नाटक, लेखन कार्यशाला, कविता कार्यक्रम, नाटक मञ्चन, गजल, सङ्गीत र देउडा जस्ता कार्यक्रमहरू आयोजना गरिएका थिए। ‘रामलीला नाच’ विशेष आकर्षण बनेको थियो।
महोत्सवअघि पनि नाटक र लेखन सम्बन्धी कार्यशालाहरू सञ्चालन गरिएका थिए, जसले युवाहरूलाई सिर्जनात्मक बन्न सहयोग गरेको बताइएको छ।
विद्यार्थीहरूको परीक्षा भएका कारण सहभागिता केही कम भए पनि अन्य दर्शक र साहित्यप्रेमीहरूको राम्रो उपस्थिति रहेको थियो।
आयोजकका अनुसार यस महोत्सवले टीकापुरलाई साहित्य र संस्कृतिको केन्द्र बनाउन मद्दत गर्नेछ। साथै, यसले विभिन्न समुदायबीच सद्भाव र समझदारी बढाउन पनि सहयोग गरेको छ।
