प्रविन चाैधरी। पवेरा, २१ अगहन । कैलालीके कैलारी गाउँपालिकामे अइना पुस महिनामे हुइना अध्यक्ष कपके लाग वडा स्तरीय टिम छनौट सुरु हुइल लागल बा । गाउँपालिकाके नौ वडा मन्से अब्बेसम अधिकाँस वडा नम्बरमे वडा स्तरीय प्रतियोगिता करटी टिम छनौट हुसेकल बा ।
कैलारी गाउँ पालिका के ५नं. वडामे फेन आज (बुधबार) से खेल सुरु हुईल बा खेल न्यु प्रशंसा युवा क्लव बैजपुरके खेल मैदानमे हुईटी रहल बा । उद्घाटन खेल पुरुष फुट्बल तर्फ न्यु प्रशंसा युवा क्लव बैजपुर व सृजना समाज छुट्की पलिया बिच हुईल रहे ।खेल उद्घाटन कैलारी ५नं.के अध्यक्ष विष्णु प्रसाद चौधरी रिवनकाट्के बल पास करके खेल सुचारु करल रहिट ।खेल उद्घाटन मे अध्यक्ष सहित वडा सदस्य,महिला सदस्य राजनैतिक दल हुकन के उपस्थिति रहे। पहिल उद्घाटन खेलमे न्यु प्रशंसा युवा क्लव हाफ से आगे सृजना समाज हे १गोल मर्ले रहे तर सृजना समाज हाफ पाछे १गोल मारके बाराबर हुईल । निर्धारित टाईम मे बराबर हुईल पाछे पेनाल्टी सुट हुईल रहे। पाँच पाँच जहनके पेनाल्टी सुट आउटमे सृजना समाज छुट्की पलिया बैजपुर हे ०-३ गोल करके सृजना समाज जित हासिल करले बा । दुसर खेल भलिबल पुरुष तर्फ बैजपुर गाँउ(क्लब) जवदहवा गाँउ(क्लव) बिच हुईल बेष्ट अफ थ्री मे बैजपुर गाउँ(क्लव)लगातार दुई खेल अपन पक्षमे पारके विजय हुईल बा ।अस्तेक तिसर खेल पुरुष फुटबल गोबरैला गाँउ(क्लव) व सड्कपुर बिच हुइल खेलमे गोबरैला हे सड्कपुर हाफसे पहिले ६ गोल व हाफसे पाछे खेलके निर्धारित अन्तिम समय सम्म ०-८ गोल हुईल रहे। सड्कपुरके खेलाडी बिनोद चौधरी ३ गोल मारल रहित। वडा स्तरिय फुट्बल ,भलिवल,ब्याटमिन्ट खेलमे १२-१२ ठो टिम सहभागी हुईल बा। कैलारी गाउँ पालिका के सक्कु वडामे छनौट खेल ओराईल पाछे छनौट टिम ९ओैं वडासे एक – एक टिम छनौट करके आगामी कैलारी मेयर कपमे सहभागी हुइके मेयर कप खेलमे सहभागी जनैही।
