कैलाली हसुलिया,२७। कैलाली जिल्लाके कैलारी गाउँ पालिकाके कटैनी लदियासे लेके बसन्ता समके हुलाली सरक काल (बिहिबार)से पक्की पिच हुइ लागल बा। बसन्ता कोरिडोर बन क्षेत्रमे करिब २ किलो मिटर सरक बनैना काम धेर बर्षसे रुकल रहे। ई हुलाकी सरक कटैनीलदियासे बसन्ता समके लगभग २किलोमिटर सरक ईहे असार मसान्त भित्रे पक्की पिच करके काम निम जादरना हो कहिके हुलाकी सरक ठेक्का पाईल कन्ट्रकसन सिएबि.के साईड ईन्चार्ज बटैल। हुलाकी सरक पक्की पिच हुईट देख्के स्थानिय बहुट खुशी बटै। बर्खा सिजनमे बहुट हिलाकिचा रहे मने आब पिच हुइटा नेगेबेर मजा हुई। स्कुल पह्रना लर्का हुकन बहुट दु:ख रहिन । साईकलमे हिलामाटी लागके साईकल नै नेगाई सेकिट मने अब पिच हुईटा अरामसे लर्का बच्चा स्कुल जाईहि अइहि कहिके स्थानिय बासि तथा नागेश पशुपतिके शिक्षिका चन्द्रा बौखही खुशि ब्यक्त करली। पबेरा बजारमे ब्यापार कर्टी रहल शंकर थारु फेन खुशी ब्यक्त कर्ल मने एक ओर दुखेशो फेन् कर्लै यहोर टे सरक पिच हुईटा मने पबेरा बजारमे रहल पुलके हालट ओर बनैना कामके ढिला सुस्टि देख्के ई बर्ष फेन बर्खा सिजनसे पुल उप्परसे नेगे नै मिली पुल सरक नै निम्जि कि कना दुखेशो कर्ल। मने अभिन समय टमान बा ।समयमे बनैना ओर स्थानिय सरकार जनप्रतिनिधी बुद्विजिबी अगुवा सबके ध्यान जाई कलेसे हुलाकी सरक समयमे बने सेकि कना बाट पबेरा बजार के थारु बटैल।
