धनगढी, ४ असार । प्रधानमन्त्री शेरबहादुर देउवाहे कैलारी गाउँपालिकाके अध्यक्ष राजसमझ चौधरी भेटले बटै ।
धनगढी उपमहानगपालिकाके नवनिर्मित प्रशासनिक भवन उद्घाटन करे धनगढी पुगल प्रधानमन्त्री देउवाहे कैलारीके अध्यक्ष राजसमझ भेटल हुइट । भेटमे अध्यक्ष राजसमझ चौधरी प्रधानमन्त्री देउवाहे कैलारीके लडिया कटान, डुबान, डगरघाट, बहुमुखी क्याम्पस, सिचाई, विद्युत लगायत टमान समस्या समाधानके लाग मौखिम रुपमे माग करले बटै ।
अध्यक्ष चौधरीसे मोहना, घुराहा, कटैनी लडियासे वर्षेणी कटानी कैनाके साथे डुबान, पटानीफे करटी ओरसे तटबन्धके लाग संघसे प्रर्याप्त बजेट विनियोजना कैना माग राखल गाउँपालिकाके प्रवक्ता तथा वडा नम्बर ७ के अध्यक्ष दिपेन्द्र बहादुर बम बटैलै ।
भेटमे प्रधानमन्त्री देउवा कैलारी गाउँपालिकाके अध्यक्ष राजसमझ चौधरीसे राखल मागप्रति अपने सकारात्मक रहल बटैलै । कैलारी गाउँपालिकासे राखल माग सम्बोधनके लाग संघीय सरकार पूर्ण रुपमे सहयोग कैना प्रधानमन्त्री देउवासे बटैले बटै ।
प्रधानमन्त्री देउवा कहलै, ‘गाउँपालिकाके सक्कु समस्या लेके संघीय सरकारहे ज्ञापनपत्र बुझैहो । संघीय सरकारसे करे सेक्ना माग सम्बोधनमे कौनो कमी नइरही ।’
ओस्टेक करके प्रधानमन्त्री शेरबहादुर देउवा कैलारी गाउँपालिकाके अध्यक्ष राजसमझ चौधरीहे पार्टीसे कौनो कार्वाही नइकरल बटैले बटै । उहाँ कहलै, पार्टीसे कार्वाही करल कहटी बाहेर सब बाट भ्रामक हो । पार्टीसे कार्वाही करल कना अध्यक्ष राजसमझ चौधरीके नाउँमे अभिनसम कौनोफे पत्र नइ पठैले हो । उहाँ पार्टीके चुनाव चिन्हा लेके लरल आधिकारिक उम्मेदवार हुइट ।’पहुराबाट
