इ सलहो अाकास अोर्हम
ढरटि बिछैम
अो एक छिउटा सपना सिरन्हि बनाख
बरा निस्फिक्रि चुम्मरसे निडैम
एक्ठो अनागरिक निन्ड
हो, मै अनागरिक हुइटु इ राज्यक
इ ड्यासक
बिना बाबक जर्मल हुइटु
घुर्रम भ्याटल
गोन्यक लागल कठ
नाउ बिनाके एक्ठो अनाउक मनै हुँ
महि नागरिक निकहट इ राज्य
इ राज्यम बैठुइया समाज
इहाक नागरिक हुक्र
मने
इ डगर, हो, इ गल्लि
महि मजासे चिन्ठ
काजे कलसे
इ डगर अो मै बाँचल जिनगि अोस्ट बा
पुस माघक हिउड्या झरि अो
गनटन्ट्र अोस्ट लग्ठा महि
जेहि चोख्खुर टिस्लोर झिर जसिन
भिट्टरसम फ्वाँग पर्नागरि घोच्टि रहट
चैट बैसाखक हुरि बौखा अो डुर्वा डैटर्वा
छियनलिस पाछक बिस्वक नमुना
लोकटन्ट्र जस्ट लागट
जौन मै डग्रिक पन्ज्रसे टुरल
झोग्डि झोग्डाफे अछिन्ख बेचडिहल
ज्याक, सक्टि वाकर भक्टिक बजार म
अँ,
इ समाजबाडि गनटन्ट्र अो
जेठ असारक चिरक्यान घाम अोस्ट लग्ठा
उह घामलेख जरल म्वाँ नँग्ट अाँग्गक रंग
अो म्वाँर सप्नक रंग अोस्ट बा
अाब कह परल
इ नागरिक राज्यम
एक्ठो बनागिल अनागरिक मनिया
कौन अाडर्सक लाग बाचु
कौन सिडान्टके लाग बाचु
कौन बेबस्ठक लाग बाचु
अो कौन लौव रंगक लाग बाचु
महि बाँच परल निहो
इ नागरिक ड्यास म राज्य म
बेन बाटु मै अाजकाल
एक्ठो अल्ग अान्डोलन म
फरछ्वार रहल अाकासह अोहर्खन
अो नँग्ट ढरटि बिछाखन
म्वाँ जसिन
बिना नाउक अनागरिक हुकन्हँक
एक्ठो छुट्ट ड्यास छुट्ट राज्य
बनैना अान्डोलन म
जाहाँ घोसना हुइने बा
इ नागरिक राज्यक नागरिक हुक्र
“अनागरिक”
अो लिह्वा पहि हुकन्हँक
टिन पुस्ट्या परिचय पहिचान अाखिर
मै एक “अनागरिक” इ ड्यासक
