सोम डेमनडौरा
थारु समुदायम डफ बरा चलल् गाना बजाना हो । यिहिँका कहुँ ढुमरु ट कहुँ ढमार फै कहिजाइठ् । ठाउँ अन्सार याकर लय व ढरानम फे कुछ फरक पाजिठा । विशेस कैख अगहन महिनासे फागुन सम् याकर रसलेक गाजाइठ् । माघम ढुमरु गैटि लड्यम माघ लहाई जैठ । राटभर यिह ढुमरु गैटि ढुनी जगैठ ।
डफम ढ्यार जसिन प्रेम, पीडा, दुःख, आशक्ति अँरा जाइठ् । आपन मनैय गहिर प्रेम व्यक्त करक लाग फे यि गिट गाजाइठ् । डा. गोपाल दहितसे संकलित व सम्पादित थारु डफ गित संग्रहम मोह्र्या रघुराम थारुजीक डफ गितक भाव असिन बा,
थारु समुदायम गरिबीहँ टारक लाग अउर सहर, अउर ड्यास जाई पर्ना बाध्यता रहिन् । ओसिन् ब्यालम जन्नी आपन ठर्वक प्रेमम गैठि,
राम टन्ना टरप मोर राम पिया, गैलो विदेश बिलम ना रह्यो
सँवारिक अंगना चन्डन गाछे रुखवा, जिहिमन बोलठ् कौवा
बोल बोल कौवा सउ बचना री, पियाके खबर लई आयो हो
राम टन्ना टरप मोर राम पिया, गैलो विदेश बिलम ना रह्यो
अँचला चिरी ढानी कगडा बनैबु, नैना कजलवा मसियानी
अंगरी छोली ढानी कलम बनैबु, लिखि डर्बु पियाके सन्देश हो
राम टन्ना टरप मोर राम पिया, गैलो विदेश बिलम ना रह्यो
लिखि कहि चिठिया भुइयाँ ढरि डेवै, उरि कहि कौवा लैजावै
जौन सहरम पिहवा बसटि होवै, ओहे सहरम चिठिया गिरैहो हो ।
राम टन्ना टरप मोर राम पिया, गैलो विदेश बिलम ना रह्यो
उलटिके चिठिया पलटि पठैनु, अपने ढनिया कहि आस
जो टुहु ढनिया सट कही हुइबो, सट मन ढई राख्यो हो ।
राम टन्ना टरप मोर राम पिया, गैलो विदेश बिलम ना रह्यो
जन्नी आपन ठर्वहँ भगवान रामक प्रतिककरुपम लेक कठि, राम टुँ विदेश ट गैलो, टर सुर्टम ना रहहो । पिरम ना रहहो । टुहाँर बिना म्वार यहाँ टन्ना टर्पठ् । छटपटि हुइठ् । वहाँ टुँ चिन्टम नारहहो ।
अँग्ना सवाँरक जब गझिन् चन्डनक रुख्वटर बैस्ठु । ओम्न कौवा आक ब्वालठ् । मै सोंच्ठु कौवा टुहाँर सैयौं सन्देश लन्ल बा । यिह समझक मै फे कौवसे आपन सन्देश पठैठुँ । व अर्जि कर्ठु कौवा असिहँक म्वार ठर्वक सन्देश लेक अइटि रहिस् ।
मै आपन आँचल चिर्क कागट बनैबु । आपन आँखिक काजरहँ मसि बनैम । अंग्री छोल्क कलम बनैम व लिखम आपन पियाहँ सन्देश । असिक आपन हरेक अंग प्रतिकात्मकरुपम आपन ठर्वहँ समर्पित कर्लक यि गितम पाजाइठ् । आपन मनैनक हरचिज मैयालु लग्ना । चाहे जिउक कौनो भाग रह चाहे लगैना लुग्गा या गरगहना ह्वाए ।
मै चिठि लिख्ख भुइयँम ढर्डिहम् । टैं उर्क लैजाइस् कौवा । म्वार पिया जौन सहरम हुइहिँ उह सहरम यि चिठ्ठी गिराडेहो । पहिलक जमानम फोन, इन्टरनेट निरह । हुलाकी कलक उह कौवा रल्ह । कौवा आइल् या गैल् कलसे कुछ सन्देश लेक अइलक या गैलक् मान्जाए । ओम्नहँ कुछ राहट हुइन् । ओसिहँक कौवहँ सन्देशवाहकरुपम आपन प्रेमपूर्ण चिठ्ठि पुगैना अरजी करल् बा ।
यहाँ अन्टिम लाइनम ठर्वक सन्देश आइठ् । मोर जन्नी, टुहाँर सवाल, जिज्ञाशा व प्रश्नक जवाफ पठैल बाटुँ । मै आपन मैयालु जन्नीक आसम बाटुँ । टुँ महि अस्या लग्टि रहहो । टुँ असिहँक आपन मन सत्य, सुन्दर, पवित्र ढैल रहहो । म्वार आसम पली रहहो ढानी ।
असिक यि डफक गितम आपन पिया व ढानी प्रतिक प्रेम भाव व्यक्त कैगिल् बा ।
