नेपालगञ्ज : भारतको पलियामा शारदा नदीले पुलको उत्तर तिरको सडक बगाउँदा हजारौँ यात्रु समस्यामा परेका छन् । गत साता आएको अविरल वर्षाका कारण आइतबारदेखि नेपाल–भारत जोड्ने मुख्य राजमार्ग अवरुद्ध भएको हो ।
राजमार्ग बगाएपछि एक सातादेखि पलिया गौरी फण्टा सीमा नाकाबाट आवतजावत पूर्ण रूपमा बन्द भएको छ । गौरीफण्टा नाका भएर भारतबाट आउने नेपालीहरू टिकापुरको खक्रौला, नेपालगञ्जको रुपईडिहा नाका हुँदै नेपाल भित्रिन बाध्य भएका छन् । राजमार्ग बगाएपछि लामो तथा छोटो दुरीका कुनैपनि सवारीसाधन चल्न सकेको छैन । त्यसको प्रत्यक्ष असर सीमा क्षेत्रका नेपाली बजारमा परेको छ ।
गौरिफण्टा नाका भएर भित्रिने सामानको अभाव भएको छ भने खाद्यान्न लगायतको मूल्य आकासिएको छ । एक सातादेखि खाद्यान्न लगायत पेट्रोलियम पदार्थ ढुवानी हुन सकेको छैन । भारतीय सीमा बजार वनगवाँमा समेत खाद्यान्न लगायत सामानको अभाव भएको छ । उक्त बजारमा नेपालीहरूले मात्र दैनिक करोड सम्मको कारोबार गर्दै आएको वनगवाँका व्यापारी गुड्डु सिङ गुप्ताले बताए । गुप्ताले भने, “नेपालीहरूले महँगोमा सामान खरिद गर्नु परेको छ पहिले चिनीको मूल्य ६० थियो, अहिले बढेर ८० सम्म पुगेको छ अन्य सामानको पनि मूल्य बढेको छ ।“
सुदूरपश्चिम प्रदेशका लागि भारतको बन्थरा डिपोबाट गौरीफन्टा हुँदै धनगढीको डिपोमा इन्धन आयात हुने गरेको छ । नेपाल आयल निगमले भारतको बन्थरा डिपोबाट गत आइतबार देखि सुदूरपश्चिमका लागि इन्धन ल्याउन सकेको छैन । नेपाल आयल निगम धनगढी शाखाका प्रमुख हरिदत्त जोशीले गत आइतबारदेखि इन्धनको आपूर्ति बन्द भएको जानकारी दिए ।
उनले भने, “वितरणमा समस्या भएकाले नेपालगन्जबाट ल्याउदैँछौ । एक हप्तादेखि बाटो बन्द भएको छ । हामीले स्थलगत अवलोकन गरेर आएका छौँ, गत आइतबारको वर्षाले सडकमा क्षति गरेको भएपनि मर्मत नभएको उनले बताए । पानीको सतह नघटेपछि मर्मतमा समस्या भएको हो । रुट परिवर्तनका लागि केन्द्रको निर्णय चाहिन्छ । ढुवानी भाडामा फरक पर्छ ।“ बन्थरा डिपोबाट इन्धनको आपूर्ति गर्न समस्या भएपछि आयल निगमले नेपालगन्जबाट इन्धन ढुवानी थालेको जोशीको भनाइ छ ।
एक सातादेखि ठुलो वर्षा नहुँदा पनि भारत सरकारले अवरुद्ध सडक निर्माणमा चासो नदिएको भन्दै भारतीय सीमा बजार वनगवाँँका व्यापारीले सरकार विरुद्ध आक्रोश पोखेका थिए ।
