सागर कुश्मी, सुख्खर, २७ सावन । नेपाल आदिवासी जनजाति पत्रकार महासंघ (फोनिज) के २६औं स्थापना दिवस मंगरके रोज घोडाघोडी नगरपालिकाके सुख्खरमे उसरल बा ।
स्थापना दिवसके अवसरमे ‘पत्रकारितामे जनजातिनके सवाल’ विषयक अन्तरक्रिया कार्यक्रममे ओइसिन जोर डेहल हो । कार्यक्रमके बर्का पहुना नेपाल आदिवासी जनजाति पत्रकार महासंघ (फोनिज) के सुदूरपश्चिम प्रदेश इन्चार्ज लखन चौधरी मिडियामे आदिवासी जनजाति समुदायके सवाल उठान करे पर्ना बटैलैं ।
उहाँ आदिवासी जनजाति शिक्षा, स्वास्थ्य, रोजगारी लगायत राजनीतिक रुपमे अन्य समुदायसे पाछे परल ओरसे उ विषयमे कलम चलाइ पर्ना बटैटी, आदिवासी जनजातिनके कला, संस्कृति, टरटिहुवार ओ पहिचानसे जोरल सक्कु चिजहे बचाइ पर्ना फेन जोर डेलैं । ओस्टके आदिवासी जनजाति पत्रकारनहे उहाँ अपन क्षमता अभिवृद्धिके लाग स्वअध्ययन करे पर्ना बटैलैं ।
फोनिजके पूर्व प्रदेश इन्चार्ज भीम चौधरी पत्रकारिता क्षेत्रमे अब्बेक अवस्थामे ढेर चुनौती रहल बटैलैं । उहाँ सामाजिक सञ्जाल फेसबुक, अनलाइनसे टमान पत्रकारनहे चुनौटी थपल बटैटी उहे अनुसार अपन क्षमता बह्राइ पर्ना जोर डेलैं ।
फोनिज प्रदेश अध्यक्ष उन्नती चौधरी, आदिवासी जनजाति पत्रकारनके क्षमता अभिवृद्धिके लाग स्थानीय तहसे समन्वय ओ सहकार्य कैटी तालिम सञ्चालन कैना बटैलैं । उहाँ आदिवासी जनजाति पत्रकारनके हक अधिकारके लाग एकजुट हुइ पर्ना फेन बटैलैं ।
फोनिज प्रदेश सचिव हरेन्द्र चौधरी आदिवासी जनजाति पत्रकारनसे सञ्चालन करल मिडिया ओ पत्रकारनके क्षमता अभिवृद्धि कैना आवश्यक रहल बटैलैं ।
फोनिज कैलाली जिल्ला अध्यक्ष राम दहित आदिवासी जनजाति पत्रकारनके क्षमता अधिवृद्धिके लाग तालिम लगायत कार्यक्रमके लाग स्थानीय सरकार ओ प्रदेश सरकारसे समन्वय सहकार्य कैके आघे बह्रना बटैलैं ।
घोडाघोडी एफएमके सञ्चालक स्वरुप चौधरी अनलाइन मिडियाके कारण अब्बे एफएम रेडियो विस्थापित हुइना अवस्थामे पुगल बटैटी एफएम रेडियोहे फेन बचैना आवश्यक रहल बटैलैं ।
थारुनके डटकमके सञ्चालक रामप्रसाद चौधरी समय अनुसार अपनहे अनलाइन पत्रकारिता ओर फेन दक्ष बने पर्ना बटैलैं ।
कठरिया सन्देश पत्रिकाके सम्पादक टिआर कठरिया भाषिक पत्रिका चलैना चुनौटी रहल बटैलैं । पहुरा थारु दैनिकके पहलवानपुर ब्युरो प्रमुख जीवन चौधरी पत्रकारनके दक्षता अभिवृद्धिके लाग तालिमके आवश्यक रहल बटैलैं ।
कार्यक्रममे हरचाली त्रैमासिकके सम्पादक सागर कुश्मी लावा अउइया पत्रकारनके लाग फोनिजसे विशेष कार्यक्रम सञ्चालन करे पर्ना जोर डेलैं । पत्रकारितासंगे बैकल्पिक व्यवसायमे फेन लग्लेसे किल पत्रकारितामे टिके ओ छिपे सेक्ना बटैलैं ।
कार्यक्रममे जोशीपुर साप्ताहिकके सम्पादक सुधराम दहित, अँख्वारी साप्ताहिकके दशीराम चौधरी, चौधरी मिडिया प्रालिके कालुराम चौधरी फेन क्षमता अभिवृद्धिके लाग तालिमके आवश्यकतामे जोर डेलैं ।
फोनिज सुदूरपश्चिम प्रदेश अध्यक्ष उन्नती चौधरीके घरगोसियाइमे हुइल कार्यक्रमके सञ्चालन महासचिव भानुप्रताप राना करले रहिंट ।
