भजनी, १७ चैत्र : अध्यक्षको निधन भएपछि कैलालीको मोहन्याल गाउँपालिकाले ५ दिन सार्वजनिक विदा दिने निर्णय गरेको छ।
गाउँपालिका अध्यक्ष नवलसिंह रावलको निधनपछि ५ दिन सार्वजनिक विदा दिने निर्णय भएको वडा नम्बर २ का अध्यक्ष देवीदत्त उपाध्याले बताए।
मंगलबार बसेको गाउँ कार्यपालिकाको आकस्मिक बैठकले अध्यक्षको निधनप्रति शोक व्यक्त जारी गर्दै चैत १८ गतेदेखि २२ गतेसम्म गाउँपालिकाभरीका सरकारी र गैरसरकारी कार्यालय बन्द गर्ने निर्णय गरेको उनले बताए।
त्यस्तै १० दिनसम्म सम्पूर्ण सरकारी कार्यालयमा राष्ट्रिय झण्डा आधा झुकाउने निर्णय गरेको उनले बताए।
अध्यक्ष रावलको उपचारमा लागेको ८ लाख र अन्त्येष्टिमा लाग्ने खर्च समेत गाउँपालिकाले व्यहोर्ने निर्णय गरेको उनले बताए।
७७ वर्षीय अध्यक्ष रावलको मंगलबार बिहान काठमाडौको अन्नपूर्ण न्युरो अस्पतालमा उपचारको क्रममा निधन भएको थियो।
