धनगढी, ३१ असार । लगातारके पानी परके कैलालीके मोहना लडियामे बाढ आइल बा । लगतारे ६ घण्टासम पानी परके लडियामे पानी बह्रके खतराक संकेट करल हो ।
लडियामे पानी बह्रके खतराक संकेट पार करल ओरसे बाढ पूर्वानुमान महाशाखा तटीय क्षेत्रके नागरिकहे सतर्क रहना आग्रह करले बा । अस्टेक महाशाखाके अनुसार आज कर्णाली, महाकाली लडियक कुछ सहायक लडियामे पानीके बहाव बह्रल बा ।सुदूरपश्चिम प्रदेशके दार्चुला, बैतडी, डडेल्धुरा, डोटी, अछाम, कैलाली, कञ्चनपुर आसपास जिल्ला हुके बहना छोट लडियामे बहाव कुछ बह्रे सेक्ना हुइल ओरसे तटीय क्षेत्रके नागरिकहे सतर्कता अपनैना महाशाखाके आग्रह बा ।
कैलालीके गोदावरी नगरपालिकाके टमान स्थान डुवानमे परल बावै । बुधके रातसे परल निरन्तरके बर्षाके कारण गोदावरी नगरपालिकके वडा नं १ ओ २ मे पर्ना अत्तरिया बजार क्षेत्र जलमग्न हुइल बा कलेसे अन्य भित्रि गाउँ डुवानमे परल स्थानीय बटैले बाटै ।भारी बर्षाके कारण भालू खोलामे पानीके बहाव बह्रेबर गोदावरी ४ बास्कोटामे १० घर डुबानमे परल बावै कलेसे उत्तर बनखेतके ४ घर डुबानमे परल हो । घर भित्रे पानी पैँठके पुरे समान पुहाइ लागलपाछे स्थानीय प्रहरीहे खबर करल रहिट ।
खबर पाइल लगत्ते ईलाका प्रहरी कार्यालय मालाखेतीसे प्रहरीके टोली वहाँ जाके घर भिट्टर रहल खाध्यान्न, लत्ताकपडा लगाएतके अत्यआवश्यक सामान सकुशल बाहर निकारके उद्धारमे खटल रहे ।ओस्टके गोदावरी २ के तेघरीमे फेन स्थानियके घरमे पानी पैँठल बा कलेसे अत्तरिया बजार जलमग्न बनल बा ।
