कविता: औली

सन्देश दहित

काट्टिक अगहनके मैन्ह
सन्झ्य बिन्हे जुरार लग्ना
डुपहरके झर्सना घाम
डिन्नक साँपा
गम्छाले आमिल नोन्नार
पस्ना पोस्टी
जिँउ टिँउके
ढान काट्क ओरैना
टीन भाइ ठाह्रे घामम
मुस्वा कोर गैल
भन्सरेन हेल्का टापी लेल
मच्छी मार गैल
ट्वार बुबा
रान परोसिन
मन्ड्रा, डफ, झालर, मन्जिरा
लेह्ल निउटा डिह गैल
३ भाइनके मारल मुस्वक सिकार
भन्सरेनके मारल मच्छिक टिना
चब्डल भँकृक झ्वार जाँर पिटि
राटिक साँपा गैलक ढमार
टुहिन खाली खाइक पियक लाक किल लागठ

यक लट्ठिम पैँरक मंजोर्वा
फुलक माला
यक बोटल डारु
चक्यक पट्ठर म
हँस्याहँ घोट्लक
सौँस्याटल हँस्याहँ
खुसी पारक लाग
जख्वा जखिन्यक पुजा कर्टी
पुरुब पच्छिउ,उट्टर डक्खिन,
सय सम्पट बै बर्कट,
लानो हो जख्वा जखिन्या
असौंक ढान पोर सालिक लेर्वा
यी मन्टर बर्बरा जैना
औलि कलक
टुहिन खाय पियक लाक किल हो लागठ