माेती रत्न
मै थारु हुँ,
सुरिक सिकार खैठुँ।
अन्दिक भाट,
चरङ्गिक टिना,
पाेँई,
मुसक चट्नी
घाेँङ्घी,
खरिया,
बरिया,
ढिक्री,
सुटही,
गेङ्गटक चट्नी
तर
घरे बाहेक
महि चिखे नै मिलठ
औरे ठाउँमे।
मै बाहेर बैठ्ठु,
कबुकाल खैनास् लागठ
चिख्नास लागठ,
भैँई-भैँई एहाेर डाैर्ठु,
थारु बासि खैना डुकान खाेज्ठु,
कलुवा, व बेरी खैना डुकान खाेज्ठु।
उ डाेकानडरुवा कहठ,
हाठक अउसान मारके डेखाईठ
उ थारु भैयक डुकान हाे
मिलि सायद,
जाउ वहाँ
डाेर्टि जैँठु,
पुछ्ठु, डाडु अन्दिक भाट मिलि,
डुकनडरुवा कठै
छैन भाइ।
मुसन चट्नि जे
छैन भाइ
फेन पुछ्ठु।
डाडु अपने थारु नै हुई का?
हजुर भाइ थारु हुँ।
थारु नै बाेल्ठी,
घरमा बाेल्छु भाई।
यहाँ बाेल्दिन।
वाह! डाेकनडरुवा डाडु
घरे टुँ थारु बाेल्ठाे,
डाेकानम् काहे नै!
खै! टाेहान थारु ब्रान्ड डाेकान,
थारु भाषम् खैनक
चिजके लिस्ट खै?
थारु परिकार खै!
थारु खानपान खै!
अन्डिक भाट खै।
सुरिक सिकार खै!
घाेँघी खै!
पाेँईक टिना खै!
सुटही खै!
गेङ्गटक चट्नी खै!
कब बनैबाे थारु ब्रान्ड!
कब सम बेच्बाे
चाईनिज फास्ट फुड,
इन्डियन थाली,
औरक ब्रान्ड।
कब बनैबाे
थारु ब्रान्ड!
मै थारु हुँ।
थारु बाेल्ठु,
थारु बुझ्ठु,
थारु डिमाग बा माेरठेन,
खै! काहे
माेर थारु डिमाग केल चलठ,
apple कलेसे सेउ बुझ्ठु
ball कलेसे गेन्डा जन्ठु।
sprider man कलेसे मकरा मनिया बुझ्ठु,
स्कुलिम महि
apple कहिके स्याउ
ball कहिके भकुण्डो
sprider man कहिके माकुराे मान्छे
सिखाई लग्ठै
माेर खाेपरी हिलठ।
मास्टर जिसे पुछ्नु
apple कलक टे सेउ हाे
टुँ मास्टर जि काहे स्याउ पह्रैठै?
a for apple
Not a seu
माेर चक्कर चक्कर आइठ्।
मास्टर जि अपने थारु भाषम्
नै पह्हैठि का?
yes, Iam Tharu
But
this is English medium school
I speak Only English
मै टे नै जन्ठु
ईङ्गलिस् वङ्गलिस्,
मास्टरजि
महि थारु भाषम्
पह्रना स्कुल मिलि का?
Nowhere?
you cannot find even in one.
खै! मास्टर जि
कब पह्रम मै अपन भाषम्
थारु भाषक् किटाब खै!
थारु भाषा पर्हाई खै!
थारु भाषक स्कुल खै,
थारु भाषम् सुचना खै,
थारु भाषक गुगल सर्च खै,
थारु भाषक् कलेण्डर खै,
थारु भाषक् ब्रान्ड खै!
सब जहन डेखाे,
काेई ईङ्लिस,
चाइनिज,
काेरियन,
जापनिज,
बंगाली,
हिन्दी,
नेपाली,
मैँ टे खाेजटुँ
थारु भाषम् पर्हाई,
थारु भाषक स्कुल,
थारु भाषक गुगल सर्च,
थारु भाषक कलेण्डर,
थारु भाषक ब्रान्ड।
बैजपुर (कैलाली)
