लेखक – गणेश वर्तमान
बौँरा
बिन जरक बौँरा
ज्याकर जर निहुइटिस
बस लह्रा बाटिस
इ चाहा जाहाँफे
बरा लिरौसिसे पहुँर जाइट
ना इहि पानी चहठिस
ना इहि मल चहठिस
टभुन बरा लिरौसिसे पहुँर लिहेठ ।
बौँरा
बिन जरक बौँरा
ज्याकर जर निहुइटिस
बस लह्रा बाटिस
इ बौँरा
डङ लक्टिक बौँरा
भाजिक साग असक
जठ्ठसे खोँट्बो
ओठ्ठसे पल्हा जाइट ।
बौँरा
बिन जरक बौँरा
ज्याकर जर निहुइटिइस
बस लह्रा बाटिस
बौँरा
महा घिनाहुन बौँरा
याकर ढ्यार लह्रा बाटिस
-भ्रष्टाचार
-कुविचार
-असमानता
-प्रतिक्रान्ति
-यथास्थितिवाद
-सामन्तवाद
-साम्राज्यवाद
लगायत लगायत ….।
बौँरा
बिन जरक बौँरा
महा घिनाहुन बौँरा
जेहिँ उक्ठाइकला
मनै एहिँ चिन्लहक डिनसे
कोप्रक कोप्रा आपन पस्ना बहाइल बाट
कोप्रक कोप्रा आपन रकट बहाइल बाट
जर रलक बौँर उक्ठिना कर्रा परट
बिन जरक बौँर कसिक उक्ठिना हो ?
@गणेश वर्तमान
