कैलाली — सुदूरपश्चिमको कैलाली जिल्लामा बढ्दो गर्मीले जनजीवन मात्रै होइन, विद्यालयको पठनपाठनसमेत गम्भीर रूपमा प्रभावित बनेको छ। तापक्रम ४१ डिग्री सेल्सियसभन्दा माथि पुगेपछि टीकापुर क्षेत्रका विद्यालयहरूमा विद्यार्थी कक्षामै बेहोस हुन थालेका छन्।
सोमबार कर्णाली माध्यमिक विद्यालय का चार विद्यार्थी अत्यधिक गर्मीका कारण बेहोस भएपछि विद्यालय प्रशासनले उनीहरूलाई आराम कक्षामा राखेर उपचार गर्नुपरेको थियो। मंगलबार पनि दुई विद्यार्थी बिरामी परेको विद्यालय स्रोतले जनाएको छ।
कक्षाकोठा नै बने ‘तातो भट्टी’
विद्यार्थीहरूका अनुसार एउटै कक्षामा ८० देखि १०० जनासम्म विद्यार्थी राखिने, पर्याप्त पङ्खा नहुनु तथा अनियमित विद्युत् आपूर्तिले गर्मी असह्य बनेको छ। धेरै विद्यार्थी टाउको दुख्ने, चक्कर आउने, अत्यधिक पसिना आउने तथा बीचमै पढाइ छोडेर घर फर्किन बाध्य भइरहेका छन्।
विशेषगरी टिनका छाना भएका विद्यालयका कक्षाकोठा दिउँसो झन् बढी तातिने भएकाले विद्यार्थीहरूलाई बस्नै कठिन भएको गुनासो छ।
बिहानको प्रार्थना बन्द, तर समस्या यथावत्
विद्यालयका प्रधानाध्यापकहरूका अनुसार अत्यधिक गर्मीका कारण बिहानको प्रार्थना कार्यक्रम बन्द गरिएको छ। तर, दिउँसो सञ्चालन भइरहेका कक्षाले बालबालिकाको स्वास्थ्यमा थप असर पारिरहेको उनीहरूको भनाइ छ।
अभिभावकहरूले पनि अहिलेको मौसमलाई ध्यानमा राख्दै बिहानको समयमा मात्रै कक्षा सञ्चालन गर्न माग गरेका छन्।
तापक्रम लगातार ४०–४१ डिग्रीमा
जल तथा मौसम विज्ञान कार्यालय अत्तरिया का अनुसार कैलालीको तापक्रम लगातार ४० देखि ४१ डिग्री सेल्सियसको आसपास मापन भइरहेको छ। केही दिनअघि यही चर्को गर्मीका कारण सशस्त्र प्रहरीका जवानसमेत ‘हिट स्ट्रोक’ भएर बेहोस भएका थिए।
स्वास्थ्य जोखिमसँग जुध्दै विद्यार्थी
अत्यधिक गर्मी, कमजोर विद्यालय पूर्वाधार र स्वास्थ्य जोखिमका कारण अहिले कैलालीका विद्यार्थीहरूको नियमित पढाइ नै संकटमा परेको देखिन्छ। तत्काल प्रभावकारी व्यवस्थापन नगरे बालबालिकाको स्वास्थ्यमा थप गम्भीर असर पर्न सक्ने चिन्ता बढेको छ।
