थारू साहित्यकार गणेश बर्तमान र कैलारी पोष्टको सहकार्यमा थारू भाषी लघुकथा श्रृंखला सुरु भएको छ। साहित्यकार गणेश बर्तमानको यूट्यूब च्यानल र kailari TV यूट्यूब च्यानलबाट बर्तमानको आवाजमा भिडियो अपलोड हुनेछ भने यस कैलारी पोष्ट मार्फत उक्त थारू भाषी लघुकथालाई अक्षरमा पढ्न सकिनेछ। यस श्रृंखलामा सहभागी हुनका लागी साहित्यकार गणेश बर्तमानको म्यासेन्जर तथा कैलारी पोष्टको म्यासेन्जर साथै ईमेल kailaripost@gmail.com र bartamanganesh@gmail.com मा लघुकथा आफनै आवाजमा पनि रिकॉर्ड गरी पठाई सहभागी हून सक्नुहुनेछ। श्रृंखलामा बाचन गरिएका सबै लघुकथालाई पिदिफ पुस्तकको रूप दिएर अनलाइन प्रकाशन गरिने कैलारी पोष्टका सम्पादक मोती रत्नले जानकारी गराउनु भएको छ। पहिलो श्रृंखला अन्तर्गतको लघुकथाहरु यस्तो छन।
लघुखिस्सा-कमैया बस्टिम भगन्वाँ(७) -डा कृष्णराज सर्वहारि
भगन्वाँ जिम्डर्वक भ्याक ढैक कौनो कमैया बस्टिम छिर्ल!उ बस्टिम का एक्ठो कमैया सभासड होस्याकल रलह!भगन्वाँ उह सभासडके पुर्ब मलिक्वक भ्याक ढर्ख गिल रलह!आपन बुर्ह्वा सभासड हुइलक म बढाई डिह आइल हुहिँ कैख सभासडके जन्नि डङ परल रलहि!टब भगन्वाँ पुछ्ल”का बा बर्कि हालचाल?”भगन्वँक बाट सुन्क सभासडके जन्नि रिसैटि कलि”का बर्कि कठो,म्वार बुर्ह्वा सभासड हुइल बाट!सभासडके जन्नि कह निसेक्ठो!”आपन गल्टि हुइलक म भगन्वाँ सभासडके जन्निसे माफ मङ्ल!जिन्गिभर मलिक्वसे माफ मङ्गुइया आस उल्ट माफ मङ्गाई पैलक म सभासडके जन्नि खुसि हुइलि!भगन्वाँ जुन्हुँक खिस्रिक्क परल रलह!
लघुखिस्सा-पहिचान (अनुबादित नेपाली लघुखिस्सा) -हेमलता उप्रेती
कालसम कर्या डाग लागल,मैल्याइल पिट्टर आस एक्लाग घोट्टैल डेख्परल!ओहिहन डियाअस बरल डेख्क चाँडि पुछल”पिट्टर भैया टुँ एक्लाग कसिक घोट्टैल हुइलो?”पिट्टर ब्वाल निपाइल रह,जस्टा बोल्ढारल!”मै कनु उहमार घोट्टैल होरहल!”जस्टक बाट कट्टि स्टिल कहल”मै स्वान जस्ट ब-न सेक्बो कनु!”स्टिलके बाट कट्टि टाँवा कहल”मै एहिँहन घोट्टैल हुइना ठाउँ डेखाडेनु!”टेन आउर जोर्से घघोट्टि कहल”डाग टोहिँ खाइ लागल कैख मै एहिँहन गर्याइल रनहुँ!”सक्कुन्हँक बाट सुनल पाछ चाँडि पुछल”टुँ काजे निबोल्ठो पिट्टर?मै जाट्टिक बाट टुहाँ मुहँमसे सु-न चहठुँ!”एकघनि पाछ पिट्टर मुस्कैटि कहल”हो फुरसे कर्या कर्या,मैल्याइल रनहुँ मेै!म्वार आस्टिट्व ओराई लागल रह!अप्न हुँकनक हौस्ला व सहेउग ले क आपनहन बचाइ सेक्नु!आपन म रलक चास डेखाइ पैनु!उहमार असिक बरल बाटु!असिक आपन जिउक मट्लब निकर्ख,डुख सह क,म्वार म रलक निमजा चास ह जरा क महि जाट्टिक टल्कुइया भर कुइला हो!” (अनुबाड -गणेश वर्तमान )
लघुखिस्सा-बौनि -सत्यनारायण दहित
“मै कठुँ यि लवन्डि अइसिन अइसिन खैना चिज काहाँ भेटाइट ना?जहोँरफे खैना खोज्टि रहट काहुँ!डुन्यँक मनै का कह ठुहि!”मै चुनियक हाँठम क्याटबरि चक्लेट डेख्क बर्बरैनु!ओकर हाँठम यि चक्लेट आझ मै डुबारा ड्याख्टहुँ!”एक्ठो अंकल डेलै का मम्मि!” “अरि के अंकल हो टोेरिक?” “खै मै चिन्हबे निकर्ठु टे!” “कत्रा सिखैबो बाहेरके नै चिन्हल मनैन् के डेहल खैना ठिक नाइ हो ! माने टब्टो यि लवन्डि!कैसिन कैसिन मनै रठै आझ् काल्हिक!महि ट डर लागठ बरा!बाबा पटा पहिस टे जानो का कर्ठिस!काम कर्ना मनै कहाँ सम पछेरा लागल रना लर्कनके पाछे!”चार चार बर्सक चुनिया आझफेन फोहैटि मोर ठन डौर्टि आइल!मै ओकर हाँठेम एक्ठो डब्बा डेख्नु!”मम्मि मम्मि हेरो ना!आझ उहे अंकल का डेले बाटै!”मै एकफाले झस्क असक कैनु!घर बहर्टि बहर्टि ओकर हाँठमसे डब्बा लैलेनु!ओहो कट्ना सुघ्घरसे सर्हल रहे उ डब्बा!मै बरे उत्सुकटासे डरा डरा खोल्नु उ डब्बा!खोल्टि किल चुनिया फोहिक मारे चिल्लैटि कुड्गे लागल!उ ओहे डब्बा मनिक क्याटबरि चक्लेटके सँगे एक्ठो टुलटुल लाल बरा सुघ्घुर परि फराक रहे!मै उ फराक उठैनु टे ओकर टरे एक्ठो कागटके टुक्रा डेख्नु !लिखल रहे,गलट ना सोच्बि सर म्याडम !मोर छाई आपन डाईसे भेट करे भगन्वँक घर चल्गिल !आझ ओकर जलम डिन हुइस!मै आपन छाईक बौनि अप्नेक छाईमे डेख्नु”
लघुखिस्सा-डक्टार -कल्याण पन्त
रेड्यो,टि भि ,यूटुब हेर्ख साढ्य निरह!मुक जिनु कना मनैफे ढिउर रलह!लग्गुक घरक मनैफे डक्टारसे घर निअइलक दुई हप्टा होस्याकल रह!कहोरे सुट्ना खालि ठाउँ निरह!यिहँर नाकिमसे स्याँप बह निछवारल रह!घुम्रिफे लाग्टह!एकडिन गेटसे बाहेर निक्रनु!मै तीन चार बर्स आगसे पेसरके बेराम रनहुँ!आउर कर्रसे बेराम लागल पाछ सेक निसेक्क डक्टार पुग्नु!मै पेसरके बेरहम्याँ हुइटु कनु!पेसर नाप्डि कैख हाँठ नफिनु!उहाँक मनैया महि और बाटम भुलिटि भिटामिनके पोक्या डेखाइल!टब मै उहाँ से चल्गिनु!पाछ निजि डक्टार पुग्नु!बरबेर रुक्नु टब एक्ठो डक्टर्वा डस हाँठ डुससे ब्वालल!पेसर रलक बाट बटिनु!पिपिई घालल मनैया म्वार स्वाब लिहल!टब महि उहाँ भर्ना करगिल!ड्वासर डिन उहँक एक बगाल मनै अइल व म्वार पेसर नप्ल!रिपोर्ट नेगेटिभ आइल रह काहु!सम्झाइ अस कर्क महि डिस्चार्ज करडेल!एक मैन्हँक कमाहि बुझिनु व मुहमसे निक्रल “ठुक्क डक्टार” (अनुबाड -गणेश वर्तमान )
लघुखिस्सा-भक्टान बुडि -अनिल थारु
सावन मैन्हाँ निम्झा क भडौ लाग्टह!पानी जुन्हुँक उढ्याई असक आए!खेट्वा निम्टलक उहँरसे भक्टान बुबा हर्चालि करँट!कबु खोङ्घ्या,डेल्या,ढर्ह्या बिन्ना ट कबु खट्या मच्या भङ्ना!पानी उझुक उझुक आइ असक बुबा माखुर खाइ टलह!”सस्सुर नै क,यि सल्वा नस्से मछ्छि खाई मिलि रि बड्डि!”आपन बेङ्ठा व ठुठ्ठि अङ्ग्रि ले क ढेब्रम माखुर ढर्टि बर्बराइटलह!हुँकाहार बड्डि जुन्हुँक पाकल पिप्पर पाल्हिम पसर्लि व कलि”सालो जम्म मछ्छि चोरा ढर्ठो काहुँ !बरेर्वा ट्याकल मनै हौस्यार हुइ परट कबो फे!”करट करट धान फुल्क ,फर्क पक्ना ब्याला हुइटह!एकडिन बुबा गोब्रैलक नर्सरिक आग बन्ढ्वा बहन्ल व बरेर्वा टेक्ल!पाँच ठो ढर्ह्या ,डस ठो सिसिक खोङ्घ्याफे पहाँट लगा क लगाइल रलह!पानी आइ भागल ट मछ्छिफे ओल्हाइ लग्ल!मछ्छि बा-झ भिर्ल हुरडुरहेँट,डेल्या अँस्टावन!सेढ्रि,डेँर्वा,चरङ्गि,नम्ठोह्रि,मङ्ग्रा,बम्लि,टेङ्ना मछ्छि!बुबक काम झर्ना व बुडिक काम ढुनि बना-क सुखैना होगिलिन!एकडिन मुर्गा बस्टि कि बुडि जाग्गिलि!टब बुबफे जगिलि!बुबा चुम्मर निलग्लक बाट कर्ल!टब बुडि रिसैटि कलि”निउँढार्या ,निहुँ पारढारहि,मर्ह्यलक जुमालि जम्म झार्क लैजिहि टब पटा पैबो!”बुडिहन मन डुखा क बैसल ड्याख निसेक्ल बुबा!टब बुबा आँख मिस्टि बरेर्वा ट्याकल ठाउँ पुग्ल!एकघनि पाछ अइ ल व क-ल “रि बड्डि महि सँप्वा काटल कि का?रकट आइटा जे!”बुडि बुबक बाट सुन्कफे निसुनल भ्याक ढैलेलि!पाछ घाँस का ट चल्गिलि!घाँस काट् क अइटि कि हाँक पर्लि!”अहो बड्डो”बुबा निब्वालल पाछ कोन्टिम जा क हेर्ठि ट बुबा निन्नाइल रलह!न गहिँर निन ,कब्बु निउठ्ना कैख!
