धनगढी। नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल प्रचण्ड कैलालीके बैजपुर अइटी रहल बटै ।
उहाँ बैशाख १६ गते टीकापुरमे आइल रहिट । माओवादी केन्द्रसे सञ्चालन करल हुलाकी राजमार्ग लक्षित तराई मधेश जागरण अभियान अन्तर्गतके कार्यक्रमहे सम्बोधनके लाग अध्यक्ष प्रचण्ड टीकापुर नगरपालिका वडा नं. ८ धनसिंहपुर आइल हुइट ।
नेकपा माओवादी केन्द्र टीकापुरके नगर अध्यक्ष धनसिंह साउँदसे डेहल जानकारी अनुसार बैशाख १५ गते राजापुरके कार्यक्रम ओराके प्रचण्डसहितके माओवादी केन्द्रीय नेतृत्व धनसिंहपुरमे अइलै ।
साउँदके अनुसार १६ गते सकारे सूर्यपुरसे प्रचण्डसहितके नेता मर्निङ्ग वाकमे सत्तीस्थित पदमप्रकाशेश्वर मन्दिरमे पुगलपाछे सहिद परिवार, मुक्त कमैया, कमलरी भेटघाट कार्यक्रम रहल बावै कलेसे सकारे ८ बजे झुङ्गा चौराहमे प्रचण्डसहितके नेतानसे कार्यक्रमहे सम्बोधन कैले बटै ।
अध्यक्ष प्रचण्डसँगे पूर्वउपराष्ट्रपति नन्दबहादुर पुन, महासचिव देव गुरुङ्ग, अग्नी सापकोटा, पम्फा भुसाल, उपमहासचिव शक्ति बस्नेत, जनार्दन शर्मा, सुदूरपश्चिम प्रदेश इञ्चार्ज लीलामणि पोखरेल लगायतके दर्जनौं नेता आइल जनाइल बावै ।
‘बैशाख १५ गते साँझ आके धनसिंहपुरमे बास बैठ्ना बटै, १६ गते सकारे मर्निङ्ग वाकमे जैना ओ ८ बजे कार्यक्रमहे सम्बोधन कैना कार्यतालिका तय करले बटी’ नगर अध्यक्ष साउँद कहलै, ‘कार्यक्रमके तयारीके लाग प्रदेश इञ्चार्ज लिलामणी पोखरेल शनिच्चरके पार्टीके नेतानसे छलफल करले रहीट, हम्रे कार्यक्रमके तयारी करसेकल बटी ।’
उक्त कार्यक्रमपाछे प्रचण्ड कैलारी गाउँपालिका वडा नम्बर ५ स्थित बैजपुरमे फेन कार्यक्रमहे सम्बोधन कैना जनाइल बावै । बैशाख १७ गते कञ्चनपुरमे जागरण अभियान समापन कैना जनाइल बावै ।
