धनगढी, १३ माघ । थारू भाषा साहित्यमा कलम चलाउने साहित्यकार तथा पत्रकार हृदयनारायण चौधरी थारूलाई ‘थारू साहित्य पुरस्कार २०८२’ बाट सम्मान गर्ने भएको छ ।
थारू लेखक संघ नेपाल कैलालीले साहित्यकार चौधरीलाई सम्मान गर्ने भएको हो । उनलाई यहि माघ १५ गतेदेखि १७ गतेसम्म पटेर्वा सुगौली गाउँपालिका–२, बेलवा पर्सामा हुने १०औं राष्ट्रिय थारू साहित्य सम्मेलनमा सम्मान गर्ने संघका सचिव अनिल कुश्मीले जानकारी दिए ।
बारा जिल्लाका चौधरी विशेष गरि कथा, कविता, लघुकाव्य, महाकाव्य लगायतका लेखेका छन् । वि.सं २०३२ सालदेखि हालसम्म सक्रिय रुप लागेर बहुविधामा कलम चलाउँदै आएका छन् ।
संघका पूर्व अध्यक्ष सीताराम चौधरीको संयोजकत्वमा पुरस्कार छनौट समिति चयन गरेको थियो । उक्त समितिको सदस्यमा मोहन चौधरी, मनमति बखरिया, सुवेश कठरिया र सदस्य सचिवमा अनिल कुश्मीरहेका थिए । उक्त समितिले छनौट गरि सिफारिस गरेका स्रष्टालाई ‘थारू साहित्य पुरस्कार २०८२’ बाट सम्मानित गर्न लागिएको हो । थारु भाषा, साहित्य, संस्कृति र गीत संगीतको क्षेत्रमा विशेष योगदान पु¥याउने एक जना स्रष्टालाई संघले हरेक वर्ष साहित्यिक सम्मेलनमा सम्मान गर्दै आएको छ ।
संघद्वारा स्थापना गरिएको अक्षय कोषको ब्याज रकमबाट नगद ६० हजार रुपिया नगद पुरस्कार सहित प्रमाणपत्रले सम्मान गर्ने सचिव कुश्मीले जानकारी दिए । थारू भाषा, साहित्य, कला र संस्कृति आदि विधामा कलम चलाई थारू वाङ्गमयमा महत्वपूर्ण योगदान पु¥याउने लेखक, स्रष्टा, साहित्यकार, कलाकार एवं अनुसन्धान कर्ताहरुलाई सम्मान तथा पुरस्कार प्रदान गर्ने उद्देश्यले संघले अक्षय कोष स्थापना गरेको छ ।
सोही कार्यक्रममा प्रतिभा महिला सशक्तिकरण पुरस्कारबाट लम्कीचुहा नगरपालिका कैलालीकी गायिका समीक्ष चौधरी पनि सम्मानित हुने भएकी छन् । चर्चित तथा सफल कलाकारको रुपमा सफल भएकी गायिका चौधरीले थारू गीत संगीत उत्पादन, वितरण गरि थारू मौलिक कला संस्कृतिको प्रचारप्रसार, संरक्षण सम्वद्र्धनमा योगदान पु¥याए बाफत उनलाई सम्मान गर्ने भएको हो । पुरस्कार राशी नगद ३० हजार रहेको छ ।
रोदन मेडिकल कैलालीका सञ्चालक चन्द्रसिंह चौधरीले आफ्नो स्वर्गीय श्रीमति प्रतिभा चौधरीको पहिलो वार्षिक पुण्य तिथीको अवसरमा उक्त पुरस्कार घोषणा गरेका थिए । सञ्चालक चौधरीले एकलाखको अक्षयकोष स्थापना गरेका छन् । कोरोना कारण २०७८ मा उनकी श्रीमति प्रतिभाको निधन भएको थियो ।
