सन्देश दहित जानकी गा. पा. २ खर्गौली
बिन्हे यक बाँङ मुर्गा बोल्लसे
झसङ्गसे किच्रहा आँखी उघर्टी
जाम्ही छुट्टि
पौली ग्वारक पौवा ख्वाजट
बगर्वाम बर्डा भैँस बाँ बाँ गोहरैना
हटपट चप्का पकर्ल
बगर्वम छिर्ना
नम्हैरिक डाँठले मेर्ह्रल
छट्री कप्पारिम ढैल
यक हाँठम बर्डनके छँर्की
यक हाँठम मच्या
यक कन्ढम हर
यक कन्ढम जुवा लेह्ल
जुनक जुन खेट्वम बिटैना
किसान हुइटै
ढुप्पन घाम बर्खहा मौसम
पिठी चट्कैना जसिन जेठ असारके मैन्हम
भिन्सरक निक्रल
सजना मैना गैटी खेट्वा चैनार कर्ना
उप्परसे पानी नै बर्सना
कुल्वम पानी निअइना
डरार फाटल ढर्टी
अँह अँह टक टक कर्टी
रकट पस्ना चुहाक स्वान फरैना
किसान हुइटै
बरस भर हिला किचम हाँठ ग्वार सरा सरा
घाम सिटे कपार ढिका ढिका
भुखे प्यासे
फाटल आँङ्गक अँङ्या बेँउची फाटल ग्वारा
औरक बटैया लगाक
घरक समस्याहँ टारम कैक
बजार म ढानक म्वाल ख्वाज जैना
आपन्ने फराइल स्वानके अप्ने म्वाल करा निपैना
अनाज सस्टा मलखाड महंगा असिन भोगुइया
किसान हुइटै ।
