छुटी खिस्सा: कमरा भिज गैल

झोलबोकान बिलरा के तीन छावा रठिस मंग्रा,सिगिया,टेंग्ना।बिलरा गरिब परिवारमे जनम हुईलक कारण अपन खेत्वापेट्वा नै रठिस डोैसरके जग्गा अढियाबटैया जोट्के अपन लर्का पालठ।बिलरक जन्नि तिनठो लर्का पाके उरहर गैल रठिस।सक्कु बोझा बिलरा उठईठ।राटोदिन एक करके बिलरा अपन लर्कान हे पल्टी सयान जवान करढारठ।मंग्रा ओ सिगीय अपन बाबक पाछेपाछे रहलक ढिरे ढिरे सब काम कर्ना मे सिपार हुजैठ।अपनहे कामकरके खाईसेक्ना हुगिल रठ।छोट्कि छावा टेंगना डुलारु रहना ओ छोटि छावा हुइलक ओरसे काम मे ध्यान नै डेहे ।बिलरक बर्का छावा ओ मझला छावा अपन बाबक गुन कुछ नै छोरले रठै।महा काम करनाहा। कुछ बरष बाड मे टेगना फेन जवान हुईजाईठ तर फेन एक सिका नैउठाईठ।बहुटजाँगरचोर,जगरकोह्रि ,खडह्रा बा खैनामे भर आघे बा सारे ..कहिके डाडुन गरयैठिस।तबो नै पानी परठिस टेगनक।एक कानसे सुने डोसर कानसे उरा डेहे बात ।
जवान हुईल टिनु छावनके बिलरा भोजब्याह करना सुरसार करठ ओ एक दिन टिनु छावा बैठाके ज्ञानगुनके बात समझाईटी कहठ हेरो लरको मै अब बुह्रागैनु मोर जाँगरबौसा नै हो अब..टुहरिनके भोज करना उमेर हुइसेकल बा।पटुहिया फेन खोज सेक्लबटु कहिके कहठ।बिलरा अपन छुट्की छावा हे समझैटी कहठ हेर छावा अब टे टै जवान हुगैले काम कर्के खैना हुगल बटे टबुफेन कुछु काम नै करठे।टोर कमरा कब भिजि?जिसदिन कमरा भिजि तब पता चलि हेर । “कोद्रा मारो सोनेसोन(फल)” काम कर बे टब टे परिवार पाले सेक्बे कहिके समझ्ईठ।ओ सब के भोज करडेहठ। छावनके भोज कर्लक कुछ महिना बाड मे  छावन कहठ अब मै कुछ दिन के पहुना हु मिलके रह हो आझ बटु काल्ह का हुईठ.. कहठ ।ना कति बिलरा ओहे राट्के कबु नै उठ्ना मेरके सुट्जाई।टिनुजे मिलके बाबक काजक्रिया करठै।
बाबक मुवल महिनापाख बिटे नै पाईठ घरेम राटदिन हैमस मच्जैठन।एक्के रकटसे जलम लेहल भाईन के टे बाट नै मिलठिन कलसे सट्टर घरेक बेटी …।घर फुट्जैठ भाईभाई। बर्का ओ मझला छोट्हि से बाबक संगे काम कर्लक सब चिजके सिपार रहित अपन परिवार पल्ना मे खासे कर्रा नै परलिन।सरसरहेक सब चिज जोर लग्ठै।छोट्का (टेगना)जुन मुलुर मुलुर हेरठ अपन डाडुन के प्रगटी करट।
टेगना सोचठ परिवार पालक लग टे काम करहि परि डाडुन सब चिज जोरसेक्लै ।बहुट सोच मे परजाईठ टेगना कसिक परिवार पालु कहिके।जिम्मेवारि घर खर्चा कसिक चलाउ कहिके  कपारिम हाठ ढरके गहिर के सोचठ।बाबक कहल कहकुट समझठ …।कोद्रा उठाईठ ओ टिनाटावन लगैना बारीमे पसिनेपसिन भकाभक बारी कोरटि पस्ना पोछटी बाबक कहल शब्ड मारो कोद्रा सोनेसोन…कमरा भिजि तब पता चलि कना याड करठ।बारीमे टिना लगाईठ। अत्रा मजा टिनाटावन फरठिस कि हडसे ज्याडा टिनाटावन बेच्के घर खर्चा पुगे लग्ठिस। टेगना अपन बाबक कहल शब्ड के वास्तविक अर्थ भर्खे बुझठ ….कमरा भिज गैलिस टेगनक…अब।