-गणेश वर्तमान बर्दिया
बाहेर निक्रो
क्याकर डर डराइटो
का बाट कना बा कहो
काजे अक्कले बर्बराइटो
बह्रिक फोङ्चिर्वमसे ह्यारबेर
उ टुहिन निड्याख्ठो
सक्कु घरक ड्वार टाँटि लगाइल बा
ठकाइल गह्राअस
चब्डामुन बा
महि लाग्टा
टुँ मुवक डराइटो
बिन्ह्या उठ्ठो टब्बसे
टुहाँर भावनक हट्या करजाइठ
टुहाँर रहरिक हट्या करजाइठ
टुँहार ढान फराके
सालभर प्याटभर खैना सप्ना जरट
टुँ जिट्टिहँ
मुस्याकल पठ्राअस
आङ् मुअक काजे डराइटो
मै सड्ड कठुँ टुहिन
मै जिकेफे मुअल बाटु
टोरैया मुकफे जिअल बा
मै टुहार गुरु हुँ कैख
टुँ मै नाबनो
टुँ टोरैया बनो
टभुन टुँ निमन्ठो लाग्टा
टुँ मुअक डराइटो
टुँ बाघभालसे बच्टि बन्वा फँर्लो
ढान फर्ना,
मनै बैस्ना ठाउ बनिलो
आस वाकर मलिक्वा
अछामसे अइलक मनियाँ बा
टुहार खेट्वक मलिक्वा
काजे और रना
यि सरासर अन्या हो
टुँ बिड्रोह करो कठुँ
टुँ चामचिम पल्रठो
लाग्टा टुँ मुवक डराइटो
टिकापुर म डबाइल
अवाज उठाइबेर।
आँखिक आघ
फँसागिल थारुन्हँक
घर जरागिल
पुलिसनके सुरक्षा भिट्टर
चुनाउ जिटल सांसडहन
जेल डारगिल
यि ट भार अन्या हुइल जे
टुँ याकर बिरुढ्ढम बिड्रोह करो कनु
टुँ डरिटिक डरिटिक पल्रलो
लाग्टा टुँ मुवक डराइटो
मुना ट एकडिन सक्कुहन मुना बा
कुकुरअस मुअलसे मनैअस मुओ
मजा कामक लाक लर्टि लर्टि मुओ
सन्झ्या बिन्ह्या कहबेरफे निमन्ठो
काजे कि टुहिन आपन जिउक ढिउर मैयाँ बा
लाग्टा टुँ मुवक डराइटो!! –
