हसुलिया, २५ पुस । थारु समुदायके कला संस्कृतिसंगे कृषि उत्पादनके प्रवद्र्धनके लाग कैलारी गाउँपालिकाके हसुलियामे माघ मिलन तथा कृषि मेलाके आयोजना कैजिना बा ।
कैलारी गाउँपालिका ओ सहास नेपालके संयूक्त आयोजनामे माघ मिलन तथा कृषि मेला हुइना हुइल बा । बुधके रोज गाउँपालिका अध्यक्ष राजसमझ चौधरीके अध्यक्षतामे हुइल एक कार्यक्रममे माघ १८ गतेके लाग उ मितिमे कार्यक्रम कैना प्रस्ताव कैगिल हो । गाउँपालिका अध्यक्ष यी कार्यक्रमसे थारु समुदाय लगायत और समुदायके कला, संस्कृतिके जर्गेना हुइनाके साथे स्थानीयस्तरमे उत्पादन हुइना कृषि उपज वस्तुके प्रदर्शनी तथा प्रचार प्रसार हुइना बटैलै ।
उ कार्यक्रमहे व्यवस्थित तथा प्रभावकारी बनाइक लाग सामाजिक विकास समिति संयोजक सन्तराम चौधरीके संयोजकत्वमे समिति गठन कैगिल बा । उ समितिके सदस्यमे आर्थिक विकास समिति संयोजक विष्णु प्रसाद चौधरी, कृषि शाखा प्रमुख मैया चौधरी सदस्य सचिव, सहास नेपालके प्रतिनिधि सदस्य रहल बटै । कार्यक्रमहे सहयोग तथा समन्वयके लाग अन्य संस्थाहुकनहे अनुरोध कैना निर्णय हुइल सहास नेपालके परियोजना अधिकृत नरेन्द्र चौधरी बटैलै ।
माघ मिलन कार्यक्रममे प्रत्येक वडासे वडा कार्यालयके सिफारिसमे कम्तीमे दुई ठो परम्परागत सांस्कृतिक नाँचहे सहभागी करैना ओ पुरस्कारके व्यवस्था कैना उहाँ बटैलै । माघ मिलनसंगे हुइना कृषि मेलामे कैलारी गाउँपालिकाभिटरके कृषकहुकनसे उत्पादन करल कृषि उपज बस्तुके प्रदर्शनी रना उहाँ जनैलै ।
ओस्टेक करके बुधके रोज बैठल बैठकसे कैलारी गाउँपालिका स्तरीय स्थानीय विपद व्यवस्थापन समितिहे पूर्णताच डेहक लाग पदेन बाहेकके मनोनित करे पर्ना सदस्यहुकनके मनोनयन कैना जिम्मेवारी स्थानीय विपद व्यवस्थापन समितिहे डेना निर्णय करल बा ।
ओस्टे कैलारी गाउँपालिकास्तरीय स्थानीय आपतकालिन कार्य संचालन केन्द्र गाउँपालिकाके सभाहलसे जोरल नवनिर्मित भवनमे स्थापना कैना तथा आपतकालिन कार्य संचालन केन्द्रहे सक्रिया रुपमे संचालन तथा व्यवस्थापन कैना सम्बन्धित सरोकारवालाहुकनहे अनुरोध कैना निर्णय हुइल सहास नेपालके परियोजना अधिकृत बटैलै ।
कार्यक्रममे गाउँपालिका उपाध्यक्ष भगवतीकुमारी चौधरी, वडा नम्बर १ के वडा अध्यक्ष धोजहरिपाल बोहरा, वडा नम्बर २ के वडा अध्यक्ष विकास चौधरी, वडा नम्बर ३ वडा अध्यक्ष सन्तराम चौधरी, वडा नम्बर ४ वडा अध्यक्ष ठागुराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ७ वडा अध्यक्ष दिपेन्द्रबहादुर बम (प्रवक्त), वडा नम्बर ७ वडा अध्यक्ष तारामल कठरियालगायत कार्यपालिका सदस्यm वडा सदस्य, टमान शाखाके प्रमुख, कैलारी गाउँपालिकाभिटर टमान राजनैतिक दलके प्रतिनिधि, सुरक्षा निकायके प्रतिनिधिहुकनके सहभागिता रहल रहे ।
