धनगढी । ३० औं पटकमा एसईई उत्तीर्ण भएका भागीराम चौधरी कक्षा १२ पनि उत्तीर्ण गरेका छन् ।
कैलालीको कैलारी गाउँपालिका ६ बनकट्टाका ५६ वर्षीय चौधरीले हालै सार्वजनिक भएको कक्षा १२ को परीक्षाफलमा उनी उत्तीर्ण भएका हुन् । शिक्षा प्राप्तिमा निरन्तरको मेहनत र दृढ आत्मविश्वासले उनी कक्षा १२ उत्तीर्ण भएका छन् ।
कैलारी गाउँपालिका–६ को गदरियास्थित जनता माध्यमिक विद्यालयबाट एसईई उत्तीर्ण गरेका उनी सोही विद्यालयबाटै कक्षा १२ पनि उत्तीर्ण गरेको विद्यालयका शिक्षक यामु शर्माले जानकारी दिए ।
शिक्षक शर्माले भने, ‘उहाँ प्रेरणाको स्रोत हो । मेहनत गरे सफल भइन्छ भन्ने उदाहरण हो । उहाँको लगनशिलता र सफलताले हामी विद्यालय परिवार गौरवान्तित छौ ।’
भागीराम चौधरी सोही विद्यालयमा २०५२ सालदेखि कार्यालय सहयोगीको रुपमा कार्यरत छन् ।
अब उनी स्नातक तहको अध्ययनको तयारीमा लाग्ने समेत बताएका छन् । उनले भने, ‘हेरौं अब, समयले कतिको साथ दिन्छ । स्नातक तह अध्ययनको तयारी गर्छु ।’
कैलारी गाउँपालिका १ स्थित दीपेन्द्र माध्यमिक विद्यालय हसुलियाबाट पहिलो पटक २०४८ सालमा एसएलसी परीक्षा दिएका उनलाई सफलता हात लागेन । त्यसपछि हरेक वर्ष एसएलसी परीक्षा दिँदा पनि उनी असफल भएका थिए । अन्नतः २०७९ सालमा २ जीपीए ल्याएर उत्तीर्ण भएका थिए ।
चौधरीका तीन सन्तान भने उच्च शिक्षा हासिल गरिसकेका छन् ।
