गणेश वर्तमान
कमरेड
पैल्ह टुँ हमार घर आउ खोब
हमार सङ कप्वा भाट खैटि कहो
क्रान्टि क्रान्टि क्रान्टि
टब मै फे क्रान्टि सिख्ल रनहुँ
आपन भैयहन का ट
आपन बाबसे डुस हुइ
डाईक आँखिक आँस निडेखु
बहोर्यक उ चिट्कार
महि ट टुहाँर क्रान्टिक नसा
जाँरक झ्वारसेफे कर्रसे लाग्गिल रह काहुँ
कमरेड
टुँ जब सरकार म पुग्लो
टब टुहाँर जिन्गिम ढ्यार बड्लाउ आइल
टुँ म्वार गाउँ घरव खैलक कप्वा भाट बिस्रागिलो
व आपन बर्ग बिस्रागिलो
पैल्ह महिहन बर्ग डुस्मुन कैख चिन्हाउ
जे ओइहेँयसे उठबैस कर लग्लो
मै टुहाँर उँप्पर अँङग्रि उठिनु ट
महि क्रान्टि बिरोढि कलो
व कलो राजनीटि सम्भावनक खेल हो
कमरेड
टब महि लाग लागल
टुँ व हमार बर्ग डुस्मुन म कुस फरक निहो
आपन बाबसे भैयसे लग्गु हुइनु ट
टब फे टु आके कलो।
प्रटिक्रान्टिक बिरुढ्ढम क्रान्टि
काजे कि टुँ सट्टा से बाहेर हो स्याकल रलहो।
