हसुलिया २४ सावन । थारु भाषा, कला, संस्कृति ओ साहित्यिक प्रशिक्षण संगे थारु साहित्य सृजना वाचन कार्यक्रम अमौरीमे हुइना हुइल बा ।
मनके आवाज संचालक समिती परिवारके आयोजना ओ जानकी गाउँपालिका वडा नं.-५, वडा कार्यालय अमौरीके सहयोगमे यहे अइना भाडो २ गते उक्त कार्यक्रम हुइना हुइल बा । थारु भाषा, कला, संस्कृति, साहित्य संरक्षण-प्रबर्द्धन ओ बिकृटी, कुसंस्कारहिन न्यूनीकरण कर्ना उद्देश्यले यी कार्यक्रम हुई लागल बात मनके आवाज संचालक समिती परिवार,नेपालके अध्यक्ष सुरज चौधरी “अखेल” बटैलै ।
अस्टके यी कार्यक्रम बिसेस कर्के लावा व पुरान साहित्यकारहुकनके मैगर सम्बन्ध बनैना, अन्तरक्रियाके निस्कर्षमे आइलअनुसार साहित्यिक पैला आघे बर्हैना, संयुक्त ग़ज़ल, मुक्तक छपाईके लाग लेख, रचना संकलन करना, लावा व पुरान साहित्यकारहुकनहे सम्मान करना व थारू साहित्यहे उचाईमे लन्ना फेन उद्देश्य रहल बात मनके आवाज कार्यक्रम संचालक टोहार प्यारा जानकारी करैले।
