अन्तरबार्टा: संगीट एकठो नसा जस्टे हो-गायिका काव्य

कैलाली जिल्लाके कैलारी नगरपालिका वडा नं ५ बैजपुर गाउँके गायिका कविता काव्य गायीक मध्ये एक हुइटी । उहाँ  बाबा बेचन राम चौधरी  व दाइ पबित्रा देवि चौधरीके कोखमसे जन्मल हुई  । हुँकार तुम्हर बिना, सजल सपना, कैसन तक्दिर कठरिया एल्बम ओ फुटकर थारु देउडा, दोहोरी ओ नेपाली गीत निकरल बटिन । थारु गायन क्षेत्रमे नाम कमाइल गायिका व लेखकके रुपमे स्थापिट हुइल बटी । ओस्टेके सैह्चिन साहिट्यिक त्रैमासिकके सम्पाडक समेट रहल हुईटी । एहे क्रममे कैलारी पाेष्ट.कमके सम्पादक माेती रत्नसे करल छोट्मिठ बाटचिट यहाँ प्रस्टुट कैल बा ।

• अप्ने गायन क्षेत्र ओर कहिया से लगली ? लिख्ना आशिर्वाद कहाँसे पैलि ?

मै छोटेसे गिट गुनगुनाउ स्कुल पर्हेबेर गायन डबनीभीराउ भाग फेन लेनु पुरस्कार पैनु मने रेकर्डिङ भर २०६४ सालमे कठरिया थारु भासाके तुम्हर बिना एल्बममे ४ ठो गिट गैना मौका पैनु। उ एल्बममे ३ ठो आधुनिक गीट ओ एकठो होरि धुर्हेरीके लोक गीत गैनु, ओत्ठेसे गायन सुरु हुइल ओ लिख्ना काम भर ८ क्लासमे पर्हेबेर हमार पहुरामे एकठो गजल लिख्के पठैले रहुँ उबेला गजलके संरचना बारेम कुछु ग्यान नै रहे, टभु फेन अपन लिखल रचना छापल डेख्के एकडम खुसी रहु ओत्ठेसे गोत्गाट लिख्ना प्रयास कर्नु । अग्रज दादु कृष्णराज सर्बहारी, लक्की चौधरी, मनिराम दादु हुकनके साहित्य पर्ह्ती लिख्ना प्रयास करनु ।

• अप्नेक बाल्यकाल कैसिक बिटल बटा डीना ? कब्बु नै बिस्राइ सेक्ना जिन्गीके सबसे याडगार पल का बा ?

 मोर बाल्यकाल एहे गाउँके परिबेसमे सङ्घर्यनसङ्गे हस्टी खेल्टी बिटल । छुटीमे टमान घट्ना बा, जोन एकडम याडगार बनल बा । ओमनेमसे स्कुलसे भाग्के आके, सङ्घर्यनसंगे रखौना टलुवामे सेल्खी कार्हे गैलक याड बहुट आइठ ।

• अब्बेसम सक्कु मिलाके सक्कु कैठोसम एल्बममे गिट गासेक्ली ?

पहिले-पहिले एल्बम निकर्ना चलन रहे । एक एकठो एल्बममे ७/८ ठो गीट समाबेस करे पर्ना, लगानी कर्ना कर्रा रहे । उ बेला २०६४/६५ सालमे कठरिया भासाके ३ ठो एल्बम तुम्हर बिना, सजल सपना ओ कैसन तक्दिर एल्बममे ८ ठो गीट गैलेरहु। दुर्भाग्य कना होकि कि का कना हो उ मसे कैसीन तक्दिर एल्बम लन्च नै हुइ पाइल । अब्बे ओहे मोर गाइल गीटहे बरिस्ठ गायक गायिका रामकुमार कठरिया ओ समीक्षा चौधरी थारु भासामे रिमिक्स गैले बटै। उहिसे पाछे मोर देउडा दोहोरी ओ नेपाली गीट आइल । गैल बरष मोर अपन लगानीमे अपन सब्ड सङ्गीटमे अप्नेहे गैले बटु, जलपरी बोलके आधुनिक गीट ओ धड्कन बन्के कना डोसर आधुनिक गीट राजु डाडु सङ्गे गैले बटु ।

• गायन क्षेत्र मे लागके का पैली ओ का गुमैली ?

संगीट एकठो नसा जस्टे हो, जे फेन यी क्षेत्रमे लागसेकल पाछे निक्रे नै सेकठ । ओस्टक महिन फे हुइल बा ।

यी क्षेत्रमे लाग्के मै पाइल ओसिन उपलब्ढी ढेर नै हो । टर ढेर जहन्के माया पैले बटु, मनहे खुसी मिलल बा ।

• अप्ने खास कैके कौन कौन मेरके गित गैठी ? कैसिन गित मन परठ ?

मै बिछोडके बियोग मे परल, मैयाँ प्रेम मे परल लोक गिट आधुनिक गित ओ नेपाली देउडा ओ दोहोरी गीट गैलेबटु खास कर्के महिन मर्म स्पर्शी गीट गैना मन परठ । दाइ बाबा डाडु भैयासङ्गे बैठ्के सुने नै सेक्ना, हावा ओ उछृङ्खल मेर्के गिट मै मन नै परैठु ।

• आजकाल अप्नेक गाउँ-ठाउँ ओरिक थारु गायनके अवस्ठा कैसिन बा ?

अब्बेके अवस्थामे थारु गीट सङ्गीट एकडम मौलार होगिल बा । खुसी लागठ अब्बक अवस्ठामे एकडम मजा-मजा कलाकार जन्मल बटै । टर फेन कुछ कुछ चिज सच्याइ पर्ना जरुरी बा जस्टे कि टमान-टमान गीटमे सब्ड हिन्दी सुन्मिलठ, जब कि थारु भासा अत्रा ढनी बा अत्रा ढेर हमार सब्ड रटी-रटी फेन टमान हिन्दी सब्ड बेलसल हुइल डेख परठ । यी सुढार करे पर्ना जसिन लागठ । संगीट क्षेत्र सहज पक्कै फेन नै हो, हर कोइ यी क्षेत्रमे टिकल नै हुइटै । यी क्षेत्रमे लागक लाग आर्थिक पाटो फेन सबल हुइही परठ, टब मारे टमान मजा-मजा कलाकरहुक्रे फेन हेरागिल बटै।

 ७. थारु गायनसे थारु समाजहे कैसिक आघे बर्हैटी बटी ?

सङगिट क्षेत्रसे मै थारु गीट सङगिटहे आघे बर्हाइक लाग ओसिन यि कर्नु उ कर्नु कहे सेक्ना मेर्के मै अभिन कुछु करे नै सेक्ले हु । टर निरन्टर लागल बटु । असौ २०७७ सालमे बजारमे लन्ना कैके ३ ठो गीत लिखके अप्नही सङगिट कर्के सि एल सरहे एरेन्ज करे डेले बटु, टर मै बहुट समस्याके कारणसे यी साल टीर्नु । गीट निकारे सेक्ना अवस्ठा मे नै हु । टर फेन सांगेटीक क्षेत्रहे निरंटरटा डेटी बटु।

• एक्ठो सफल गायक बनक लाग कत्रा संघर्ष करे परठ ?

एकठो सफल गायक बनकलाग साढना अनिबार्य रहठ । लोक सङ्गीटहे पछ्याइपरठ सङगिटके सिकाइ कलक लोक सङ्गीटसे कर्लेसे मजा हो ओ अग्रज हुकनसे सल्लाह सुझाब लेना जरुरी रहठ । स्रोटाहुकनके टिट-मिठ जसिन हुइलेसे फेन प्रटीकृया सुन्ना बानी बैठाइ परठ । ओस्टेक कर्के आर्थिक पाटो फेन हुइ परठ । आजकल ढेरहस जेकर लगानी ओक्रे गिट ओहे गायक-गायिका रठैँ । टब मारे आर्थिक पाटो फेन बल्गर हुइ परठ ।

• आजकालके युबनहे गायनहाेर अइना चहही टे का कहे चहबी ?

अब्बे सङ्गीट क्षेत्रमे अइना युबा हुकन मै का कना चाहम कलेसे सङ्गीट क्षेत्रमे लागटी कलेसे निरन्टर लागल रबि । एकठो गीट गाके हेरैना काम ना कर्बी, बरु अग्रज हुकनसे सल्ल्लाह-सुझाब लेके किल काम कर्ना उचित रहठ । सल्लाह जरुर लेबि कौनो फेन चिज बिना सिख्ले एक्फाले करे खोज्लेसे बहुट कठिनाइ आइठ टब मारे हजुरहुक्रे अइना डिनमे सक्कु बुझ्के लग्बी कना चाहटुँ ।

• गिटहे कैसिक परिभाषिट कर्ठी ?

गीट कलक लयमे गुनगुनाइ सेक्ना रचना हो ।

११.अन्टमे कुछ छुटल बाट बा कि कहे पर्ना ?

अन्टीममे थारु गीट साङ्गिटिक क्षेत्रमे अउइया सक्कु कलाप्रेमी हुकन स्वागट कर्ना चाहटु ओ कैलारी पोष्टहे मोर बिचार ढर्ना मौका डेलक मनसे ढन्यवाड डेना चाहटु ।