धनगढी, १४ जेठ । बझाङ छान्ना घर भई धनगढी उपमहानगरपालिका–१ शिवनगर बस्ने ४५ वर्षीय कविन्द्र रोकाया कोरोनाबाट संक्रमित भएपछि अस्पताल भर्ना भए । केही साताको उपचारपछि उनी निको भएर तीन दिनअघि घर फर्के ।
उनको रिपोर्ट नेगेटिभ आईसकेको थियो । दुई दिनअघि स्वास्थ्य बिग्रिएपछि अस्पतालाई भर्ना भएका रोकायाको हिजो सेती प्रादेशिक अस्पतालमा मृत्यु भयो । कोरोनालाई जितेपनि उनले मृत्युलाई जित्न सकेनन ।
चिकित्सकले रोकायाको रिपोर्ट नेगेटिभ आएपनि फोक्सो ड्यामेज भईसकेको बताए । धनगढी क्याम्पस रोडका हार्डवेयर व्यवसायी नरेन्द्र बोगटी पनि कोरोना संक्रमण भएपछि अस्पताल भर्ना भए ।
अक्सिजनको कमि भएपछि परिवारजनले अक्सिजनको जोहो गरिरहे । केही दिनको उपचारपछि उनको कोरोना रिपोर्ट नेगेटिभ आयो । परिवारजनमा आशा जाग्यो, अव त निको भयो भनेर । कोरोना रिपोर्ट नेगेटिभ आएपनि उनी केही दिन अघि बिते ।
धनगढीको कनरीमा मेडिकल पसल सञ्चालन गर्दै आएका भरत नाथ योगी बिरामीको उपचार गर्दा गर्दै संक्रमित भए । परिवारजनले उनलाई कोरोना उपचारका लागि अस्पताल भर्ना गरे ।
उपचारपछि उनको रिपोर्ट नेगेटिभ आयो । तर पनि उनी जोगिएनन । उनको पनि केही दिन अघि मृत्य भयो । यी केही उदाहरण हुन् । सेती प्रादेशिक अस्पतालको तथ्यांकमा कोरोनाबाट मृत्यु हुनेको संख्या हिजो दिनभरीमा शुन्य थियो । तर अस्पतालले त्यो सूचि सार्वजनिक गरिरहदा अस्पतालमै २ जनाको मृत्यु भईसकेको थियो ।
हरेक दिन यसरी मृत्यु हुने नेगेटिभ केस भने कही तथ्यांकमा देखिदैनन । सरकारले कोरोना संक्रमणबाट मृत्यु हुनेको संख्या घटेको भन्दै खुशी व्यक्त गरिरहदा नेगेटिभ भएर पनि नजोगिएका व्यक्तिका परिवारमा भने दुःखको बज्रपात भईरहेको छ ।
बिगत केही दिनयता हरेक दिन कम्तिमा एक जनाको यसरी मृत्यु भईरहेको छ । यसरी सरकारी अस्पतालमा भएका मृतकको संख्या बाहिर आईरहेको छैन । निजीको आउने त कुरै भएन ।
सेती प्रादेशिक अस्पतालका कन्सट्याण्ट फिजिसियन डा. निराजन शर्माले रिपोर्ट नेगेटिभ आउदैमा संक्रमित व्यक्ति खतरामुक्त नहुने बताए । शर्मा भन्छन्, निमोनियाले फोक्सो पुरै ड्यामेज गरिदिने भएकोले नेगेटिभ रिपोर्टपछि पनि मृत्यु हुने क्रम तिब्र भएको छ ।
डा. शर्माले रिपोर्ट नेगेटिभ आएका संक्रमितको उपचारलाई गम्भीरतापूर्वक नलिए स्थिति अझ भयावह हुने बताए । उनले भने, कोरोनाको रिपोर्ट नेगेटिभ आएपछि पनि उपचारमा सावधानी अपनाउन आवश्यक छ । पश्चिम टुडे
