दंगीशरण गाउँ पालिका ४ दाङ
साहिट्यक अाउर बिढा जसिन गजलफे परापुर्बकालसे चल्टि अाइल बिढा हो । गजलके उड्गम स्ठल अरब भुमिह मान्जिठा । बिसेसट फारसि उर्डु हिन्डि हुइटि नेपाल भिट्रल पाजाइठ । अरब भासाम “ग” के अर्ठ वानि “ज” के अर्ठ जन्नि अो अल के अर्ठ “वा” से रठा । गजलके नाउ कसिक कैगिल कना अाम्हिनसम एक्क उट्टर नि भेट्गिल हो मने अर्ठ भर प्राय सक्कुज एक्क किसिमके बयान कर्टि डिहेल भेट्जिठा । गजलके साब्डिक अर्ठ प्रेमिसे बाटचिट, जन्निनके बानि अो प्रेमिकाके बिसयम बाटचिट, मैयक बाट, यौवनके बयान, जन्निनके बयान कर्ना, प्रेमके भावना बेक्ट कर्ना अस्टख ढेर मेरिक बयान हुइठा । नेपाली सब्डकोसके अन्सार प्रेमके बिसयम सिँगारिक रसके कबिटा लिख्ना एक प्रकारके फारसि वा अोस्ट छन्डम लिखल कबिटा जो गजल हो । अाबक समयम अाखन गजलम लौव ढार जर्मलसंग गजल स्वटन्ट्र टरिकासे फेन लिख्ना फस्टाइल बा ।
अाम्हिन कनाहो कलसे स्ट्रि संगके बाटचिट केल गजल निहो कना बाट परस्ट डेख जाइट । थारु साहिट्यक जगटम हाल सक्कुज मन परैना अो सक्कुनके रोजाइ परल बिढाके रुपम गजल अाइल बा । सक्कुज मनपरैना बिढाम कुछ योगडान करि कना अभिप्रायलेख गजलकार सर्जकहुक्र फेरसे संयुक्ट गजल क्रिटि “टेम्ह्रि” निकरना परयास करल बाट इ थारु साहिट्यक लागि खुसिक बाट हो । म्वाँर डेखाइम गजल लेखन अो सर्जक संख्या बहर्टि जैनाम फेसबुकके बरा योगडान बाटिस । फेसबुक मार्फट थारु भासा साहिट्यम अट्राढेर स्रस्टा जर्मलकि अाब गन्लसे गन निसेक्ना होरहल । सर्जक स्रस्टा जर्मना कलक थारु भासा साहिट्य अाघ बहर्ना हो । ब्याल ब्यालम लौव सर्जक हुक्र मिल्ख स्याकलसम संग्रह निकरटि बाट । याकर उडाहरन हो गजलकार सर्जक हुकनके गजल संग्रह “टेम्ह्रि” थारु भासा साहिट्यम एक्ठो इट्टा ठपजैटि बा ।
“टेम्ह्रि” गजल संग्रह ह्यारबेर संग्रह भिट्टरके गजल सक्कु मेरिक भाव ब्वाकल पागिल । मैयाँ प्रेम, राजनिटिक बेँग्य, डेस प्रटिके चिन्टा, महङ्गि, भ्रस्टाचार, लुट, ठग, चेलिबेटि बेच बिखन, अाब युवाअो बिडेस नाहि अापन डेसम कुछ करि कना गजल मार्फट अाग्रह कैल बा ।
जस्टके मोती जिके इ गजल हेरि,
मै टे बटु प्रडेसमे डेसके हाल कैसिन बा,
भोटमे नोट गन्ना नेटनके टाल कैसिन बा ।
बिडेसम बैठ्कफे डेसप्रटिके मैयाँ, नेटनके चालामाला ठिक नाहि भोट म नोट सट्ठ कना चिन्टा बेक्ट करल बाटन । बिडेस गैल ब्याला अापन डेसके चिन्टा, अापन घर पर्यार, लर्का पर्का जन्नि, डाइ बाबा सम्झल बर्सौसे सोसक हुकन्से डब्वा हेप्वा पाइल थारुन्क चिट्कार गजल मार्फट इ “टेम्ह्रि” गजल पोस्टक पन्न पन्नम खौकना परयास कैल भेटैनु । यी परयास बरा मैगर परयास हो ।
दिनेश असिख लिक्ठ,
सहर टे खै कैसिन बा कैसिन नै हो,
हमार गाउँ घर टे यहाँ अन्ढार बा ।
असिन मार्मिक मन छुना सेर पौँर्ह्रा डेह सफल हुइल बाट एक सर्जक स्रस्टा जसिक घरगाउक चिन्टा कर्ठ अो लिक्ठ ।
अोस्टख डेसके नेटाव फे इ खालक चिन्टा, चासो म ढ्यान डेलसे डेसके बिकास अबस्य हुइने रह । मने खै बेबस्ठा फेर्लसेफे पुरान सिसिम लौव डारु भरसक केल हुइल जसिन इ ब्यालक अबस्ठा हो ।
असिख कटि रहल ब्यालम एच. एम लिक्ठ,
का लैके आइल बाटो ढेउर फुर्टि लगैठो,
जैना उहे डगर हो उठाइल माना रहठ !
पृठक गजलकारके पृठक भाव,सैलि अो बिम्बके उपस्ठिटिलेख पाठकके मनम बाँस बैठ सफल हुइकना डराइ नि परुया हो । कृषि प्रढानडेसके जनटा हम्र । हमार भ्वाग परल पिरा गजलकारके अापनकेल नैहोख सक्कुन्हँक सझ्या डुखपिरा हो । जसिख एच एम जि भोग्ल बाट । वाकर साझेडारि लाखौ नेपालिनके भोगाइ हो कलसे फरक नि परि ।
डेस राना सासन, पन्चायट अो बहुडलिय प्रजाटन्ट्र भ्वागल । मने अाम जनटाके भोगाइम, पिरा म एक पस्सरफे असर निपरल । अस्टख इ सेर हेरि सन्देश दहित लिक्ठ,
आपन ट कैलो कैलो म्वार फे बडनाम उरैलो,
टुहिन ट लाज ना डर हो मने म्वार ट लाज बा ।
अस्टख अापन बड्नाम कर्लो कर्लो म्वाँरफे बड्नाम कैलो कना म्वाँरफेट इज्जट मान सम्मान प्रटिस्ठा बा कना सन्देशके डुखपिरा, अभाव, असन्टुस्टि, अबेबहारिकपन हिंसा, हट्या, बलाट्कार, सामाजिक चेट्ना बेक्ट कर्ल बाट । अो समाजफे डेटि अाइल बेठिट, राजनिटिक स्वार्ठ, सट्टालिप्सा, खेटि किसानि भ्वाग परल पिरा, चरिट्रहिन बेबहार अाडि इट्याडि बाट अटाइल बा इ “टेम्ह्रि” म ।
दुर्जन असिख लिक्ठ,
नै जन्ठु कटिकिल, कहाँ हुइ आब,
सिख–साखके बनाइक परि खररा ।
समाजके डाइट्व अो जिम्मेवारी फेन युवा बगालनके कन्ढेम अाइल बा । अाब युबा हुक्रे अप्न नै जानल चिजहे पुर्खावनसे सिक्टि जाइ अो अइना पुस्टावन सिखैटि जाइ कना बाट उठैल, डेसबिकास अो सम्बृढिके लाग एकजुट होक सरकारके ड्वार ढकढकाइ परल साहिट्य मार्फट जन जागरन फैलाइ परल कना दुर्जनके चिन्टा बटिन । समाजके बास्टबिकटा, सट्यटा, इमान्डारिटा, डबाब, भुख प्यास, निरासपन, डुख अभाब, बेरोजगारि डेसके हालट, सरकारप्रटिके अाक्रोस के बिम्बहे चिट्रन कैगिल बा ।
इहाँ भागिराम असिख कठ अापन मायालुहे,
महि नि जानल हस नि डेखल हस करैठि खुब,
चुप्पेसे महि भाऊँ सर्कैटि सान मारके हेर्ठि ऊ ।
अापन मायालुके ज्या जसिन चिजफेन स्वर्ग लागठ । मन परठ् अो सँगसँग गफ म मायालुहे भुलाइबेर बिच म घाट हुइ स्याकट प्रेम जोडि बरा चोटगर लागट अजर्या राटम मिठ मिठ बाट कर्टि गाला मर्ना अो मायालुसे सँगे बिटाइल पलके झलझलि याड अाइट ।
साहिट्य बास्टबम समाजके परिपुरक हो । जौन साहिट्य समाजके अबस्ठा प्रटिबिम्बिट करठ उह साहिट्य जिबन्ट अो चिरकालसम पलि रहठ । साहिट्यकार हुक्रे समाजहन जट्रा सन्डेस डिहसेक्ठ अोट्रहे समाज बड्लट अो उह माट्रम साहिट्य जिबन्ट रहठ । समकालीन साहिट्य ह्यारबेर गजल बिढा अाब लोकप्रिय मान जाइठ । अस्टक थारु समुडायम थारु साहिट्यक पैला अाघ बहर्टि जाए कना बिस्वास लेल बाटु । मोती रत्नसे म्वाँर चिनजान फेसबुक मार्फट हुइल हो । फेसबुकम हम्र ढेर जसिन साहिट्यक बारेम बाट बट्वाइ । फेसबुकसे ज्वारल हमार साहिट्यिक सम्बन्ढ अाज क्रिटि निकरना सम पुग्ल । क्रिटिक लागि कुछटे लिख डेह परल कल । मै हँ हँ कनु उहाँ, (मोती) गजल पठैल महि सक्कु सर्जकके २/४ ठो, २/४ ठो मै गजल हेर्ख ज्या जसिन रह गजल म अोसहेक अापन डुइ चार सब्ड लिख्ना प्रयास करल बाटु । इ गजल संग्रहके सर्जक स्रस्टाहुक्रे सडाडिन साहिट्यम चम्कटि रहि कना सुभकामना डेटि इ कृटिसफलटक मैगर कामना अो पोस्टाम कुछ लिखक लागि सुअबसर डेलक म सम्पाडक संयोजक मोती रत्नजिहे हार्डिक अाभार बेक्ट कर्टि मैफे अोल्टार हुइटु ।
