हसुलिया, २० चैत । नेपाल सांस्कृतिक संघके कैलारी गाउँपालिकास्तरीय कमिटी गठन हुइल बा । हरिलाल चौधरीके संयोजकत्वमे ९ सदस्यीय नयाँ कमिटी गठन हुइल हो ।
जेकर उपसभापतिमे मञ्जु चौधरी, सचिवमे विनय चौधरी, कोषाध्यक्षमे सागर चौधरी, सदस्यमे अमृत चौधरी, रमेश चौधरी, संजय कठरिया, महावीर चौधरी चयन हुइल बटैं ।
कैलारी गाउँपालिकास्तरीय भेलामे प्रमुख अतिथि नेपाली काँग्रेस सुदूरपश्चिम प्रदेश सदस्य राजसमझ चौधरी रहिंट । कमिटीहे हार्दिक बधाई ओ शुभकामना डेटि उहाँ कहलैं, “कौनो फें समुदायके भाषा, साहित्य, संस्कृतिके संरक्षण ओ सम्बद्र्धन कैना हो कलेसे पहिले उ समुदायके युवा पिँढी जागरुक हुइ परठ ।” युवा जागरुक हुइलेसे हर चिजके विकास ओ परिवर्तन हुइ सेक्ना उहाँ बटैलैं ।
ओस्टेके, नेपाल सांस्कृतिक संघ सुदूरपश्चिम प्रदेश संयोजक सुरत रावत ‘डोटेली कान्छा’ रहिंट । थारु समुदाय कला, संस्कृतिमे सप्से धनी खन्गर हुइलेक ओर्से आब थारु समुदायके युवा संगठित होके एकजुट हुइ पर्ना बटैलैं ।
कार्यक्रममे नेपाली काँग्रेसके क्षेत्र नम्बर ३ के उम्मेदबार पुरन चौधरी पाछेक समयमे थारु गीतसंगीत मजा बजार पाइल बटैलैं । उहाँ कहलैं, “अब्बे जौन मेरके थारु गीतसंगीत आघे बर्हटा ओहे मेरके इहिसे आउर डटके लावा युवनहे समाज सेवामे लागे परि ।”
लावा कमिटीके सभापति हरिलाल चौधरी हमार थारु समुदायमे अभिन फे ढेर युवनके मन मजा–मजा प्रतीभा नुकल बा । ओइनके भिट्टरके प्रतीभा समाजमे प्रस्फुटन करक लाग अपने टन, मन, धन लगाके लागल बटैलैं ।
सक्कुहुन बधाई डेटि गायिका मञ्जु चौधरी युवनके टीम एकजुट होके लागल डेख्के खुशी हुइल बटैलैं । कलेसे अमृत चौधरी फेन अइना डिनमे कैलारी गाउँपालिकास्तरीय कार्यक्रम कैना बात वट्वइलैं ।
कार्यक्रम लोक गायक राजु चौधरीके घर गोसियाइमे हुइल भेलामे कैलारी गाउँपालिकाके सक्कु वडासे युवनके प्रतिनिधित्व हुइल रहे । सहभागी हुइल सक्कु जाने अपन अपन प्रतीभा फेन सुनैले रहिंट ।
