@गणेश वर्तमान
अरे यार बरभार बैपारि बनो
चुनाउ लग्गु आइल बा
स्याक्टो और जाहिन छेग्रि भेँरिअस किनो
निसेक्बो
आपनहन बेच्डारो
बियरिक एक बटोल डारु व एक ड्वान सिकारीम!!
काल उ निजिट्लसेफे और जिटि
चोर्वा डँक्वा बन्क मुन्टम पिटि
ढ्याम्पो भरिक डारु अक्कले पिढारि
कोप्रा भरिक सिकार अक्कले घिँस्ढारि
टुँ रैजिबो मुँ मुल्हुर-मुल्हुर हेर्टि
डारुक स्वाडम चग्रिलक मुहमक सिकार
उहमार
अरे यार नभार बैपारि बनो
चुनाउ लग्गु आइल बा
स्याक्टो और जाहिन घुइयक भाउ म किनो
निसेक्बो
आपनहन बेच्डारो
पाँच लिटर्या जर्किनिक डारु व पिलेटिक सिकारीम!!
चुनाउ कि चोर्व जिटाउ
कि डँक्व जिटाउ
और किउ रुप्या काहाँसे आनि
चुनाउसे आग
मेयरके छाइक वर्थ डे कैक पार्टी खाऊ
वडा अध्यक्षक छावक भात खवाई कैक पार्टी खाऊ
सांस्कृतिक कामहन मौन अवधी निर्वाकट्
चुनाउ ओराक
चुनाउ जिटिलक पार्टी खाऊ
एक महिनासम उ बोलुइया निहो
पाँच बरस सम बोलुइया निहो
जब सम आपन लगाइलसे चौबल रुप्या उठा निपाई
अरे यार बरभार बैपारि बनो
चुनाउ लग्गु आइल बा
स्याक्टो और जाहिन छेग्रिभेँरिअस किनो
निसेक्बो
आपनहन बेच्डारो
पाँच लिटर्या जर्किनिक डारु व पिलेटिक सिकारीम!!
उ पाँच बर्सम आपन प्रतिबद्धता पुरा करके छोरि
बेरोजगारी उन्मुलन आपन घरम करि
गरिबी आपन घरम हटाई
टुँ एक सब्डा निबोल्बो
काजेकि
चुनाउकबेर आपन मुँ टँग्गर स्याकल बाटो
डारु व सिकार ले क
अरे यार नभार बैपारि बनो
चुनाउ लग्गु आइल बा
स्याक्टो और जाहिन किनो
निसेक्बो
आपनहन बेँच्डारो
पाँच लिटर्या जर्किनिक डारु व पिलेटिक सिकारीम!!
२०७९/०२/०६
