चित्रबहादुर चौधरी
ना गाला मिलल्
ना गोन्ड्री मिलल्
ना रङ मिलल्
ना ढङ मिलल्
बिन बेसारिक काठा जिन्गी!
ना पिअ जान गइल्
ना जिअ जान गइल्
साज बनल् बा-
आँखम गल्लीक ढुर
नाकम कराहीक ढुँवा
उहमार,
डान्चेन सेंफ्लार बाटुँ
ढिउरचेन भेभ्लार बाटुँ
भेभ्ला थारू हुँ मैं!
डङ्लड्या उस्टैटी गइल्
पुहट् पुहट्
आझकाल,
अँट्कल बाटुँ छुट्कीबजारम
डरा डराके
कर्या झिल्लीम छोला बेच्ठुँ
अप्नहुँक
खुलेआम उज्जर कगडम
लड्या- खोल्ह्वा बेच्ठी!
भेभ्ला थारू हुँ मैं
डान्चेन सेंफ्लार बाटुँ
ढिउरचेन भेभ्लार बाटुँ!
