भव्यताके साथ मनागिल ‘गुरही’ टिहुवार
२५ श्रावण २०८१, शुक्रबार
भव्यताके साथ मनागिल ‘गुरही’ टिहुवार
32
Shares
facebook sharing button
twitter sharing button
email sharing button
sharethis sharing button
print sharing button
धनगढी,२५ श्रावण । थारु समुदायहुक्रे शुकके रोज भव्यता साथ गुरही टिहुवार मनैले बटै । संस्कृति संरक्षणहे निरन्तरता डेटी लौवमे हस्तान्तरण रिति संस्कृति, कला, परम्परा पुस्तान्तरण करटी जैना उद्देश्यसे पश्च्छिउ कञ्चनपुरसे संघीय राजधानी काठमाण्डौंसम भव्यताके साथ गुरही टिहुवार मनागिल बा ।
थारु समुदायके बासोवास रहल पश्च्छिउ कञ्चनपुरसे दाङ जिल्लासम प्रत्येक गाउँमे गुरही टिहुवार मनाइल बा । कलेसे कैलालीके धनगढी उपमहानगरपालिका वडा नम्बर ८ गुरही चोकमे दशौं हजारके सहभागीमे गुरही टिहुवार मनागिल बा । सखी संजाल कैलालीके कार्यवाहक संयोजक उन्नती चौधरीके घरगोस्यामे हुइल कार्यक्रममे बरका पहुना धनगढी उपमहानगरपालिकाके नगर उपप्रमुख कन्दकला राना रहल रहिट ।
धनगढी उपमहानगरपालिकाके उपप्रमुख कन्दकला कुमारी राना धनगढीके गुरही चौकमे गुरहीके मुर्ति बनैना प्रतिवद्धता जनैले बाटी । धनगढीमे आयोजित गुरही कार्यक्रम २०८१ हे सम्बोधन कैटी उप्रमुख राना गरहीके मुर्ति बनैना जिम्मेवारी लेहल हुइटी ।
‘गुरहीके मुर्ति बनैना जिम्मेवारी टमान व्यक्ति तथा निकायसे जिम्मेवारी लेहल प्रतिवद्धता जनाइल सुनजाइठ्’, उपप्रमुख राना कहली, ‘मने मुक्ति आभिनसम नै बनल हो । गुरही थारु समुदायके पहिचान, धर्मसंस्कृतिसे जोरल ओरसे यकर संरक्षण सम्र्बद्धन कैना सरकारके जिम्मेवारी हो । ओहे मारे आदिवासी जनजाति थारु समुदायसे जोरल गुरहीके मुर्ति बन्वाइना जिम्मेवारी सहित प्रतिवद्धता व्यक्त करटुँ ।’
उपप्रमुख राना आदिवासी जनजाति समुदाय आभिन फेन आर्थिक, सामाजिक, राजनैतिक रुपमे पाछे परल ओरसे आर्थिक, सामाजिक रुपमे बलगर हुइ पर्ना ओ राजनैतिक रुपमे आघे आइ पर्ना फेन बटाइल रही ।
कार्यक्रमके बर्का पहुना समेत रहल उपप्रमुख राना सक्कु समुदायके संस्कृति संरक्षण सम्र्बद्धनमे उपमहानगरपालिका जिम्मेवार रहल बटैटी अइना दिनमे फेन इ मेरके कार्यक्रमके लाग सहयोग रहना फेन बटाइल रही ।
कार्यक्रममे वडा कैलालीके प्रमुख जिल्ला अधिकारी धमेन्द्रकुमार मिश्र, वडा नम्बर ८ के वडा अध्यक्ष जुगराम चौधरी लगायत टमान व्यक्तित्वहुक्रनके सहभागिता रहल रहे । अस्टेक, थाकसके केन्द्रिय सदस्य प्रभात कुमार चौधरी, थाकस कैलालीके पूर्व कावा सभापति माधव चौधरी, धनगढी गाउँके भलमन्सा सरोज चौधरी, थारु वुद्धिजिवी चन्द्रसिंह चौधरी लगायत टमान व्यक्तित्वहुक्रनके सहभागिता रहल रहे ।
कार्यक्रममे गुरही टिहुवारके बारेमे बाटचित घरके बरघरिया ठाकुर प्रसाद करियाप्रधान, स्वागत मन्तव्य सखी संजालके सदस्य आशा चौधरी करल रही ।
विगतके तुल्नामे थारु समुदायसे गुरही टिहुवारहे संस्थागत करटी देशभरभरके मेरमेराइक ठाउँमे गुरही विशेष कार्यक्रमके आयोजना कैगिल बा । थारु समुदायके पहिचानसे जोरल परम्परागत गुरही टिहुवार विगत कुछ बरस यहोर पहिलेकसे परिमार्जित हुइटी गैल बा । गुरहीसंगसंगै संस्कृतिफे जर्गेना हुइटी गैल बा । धनगढी उपमहानगरपालिका वडा नम्बर ८ गुरही चोकमे सखि संजाल कैलाली, थारु कल्याणकरिणी सभा धनगढी नगरपालिका समिति, राष्ट्रिय थारु कलाकार मञ्च प्रदेश समिति, थारु महिला सभा कैलाली, थारु महिला सञ्जाल, थारु विद्यार्थी समाज, थारु लेखक संघ, हिरगर साहित्य बगाल, बाचचित घर धनगढी, हमार फाउन्डेसन धनगढी ओ थारु नागरिक समाजलगायत संघसंस्थाके आयोजनामे गुरही अस्रैना ओ विशेष सांस्कृतिक कार्यक्रम कैगिल बा ।
कैलारी गाउँपालिकाके हसुलियामे नेपाल सांस्कृतिक महासंघ कैलारीके आयोजना तथा कैलारी युथस यूनाइटेड क्लव ओ हसुलिया गाउँ समाजके सह आयोजनामे गुरही विशेष कार्यक्रम कैगिल बा ।
नेपाल सांस्कृतिक महासंघ कैलारीके अध्यक्ष सविता चौधरीके अध्यक्षतामे हुइल कार्यक्रममे बरका पहुना कैलारी गाउँपालिका अध्यक्ष राजसमझ चौधरी ओ विशिष्ट पहुना गाउँपालिका उपाध्यक्ष भगवतीकुमारी चौधरी रहल रहिट । कार्यक्रममे वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरीलगायत वडा सदस्यहुक्रे, हसुलिया गाउँक भल्मसालगायतके सहभागिता रहे । कार्यक्रमके संचालन मन्जु चौधरी करल रही ।
ओस्टेक करके कैलारी गाउँपालिका वडा नम्बर ८ पुर्थीपुर स्थित मोहनी बजारमे गुरही विषेश सांस्कृतिक कार्यक्रम कैगिल बा । उ कार्यक्रम मोहनी बजार व्यवस्थापन समितिके आयोजना हुइटी रहल बा ।
बरघर भलमन्सा समिति लम्की चुहा नगरपालिका कैलालीके आयोजनामे ‘थारु भाषा कला संस्कृति हमार पहिचान, यकर संरक्षण कर्ना हमार साझा अभियान’ कना नाराके साथ लम्कीचुहा नगरापालिका स्तरीय थारु भाषा कला संस्कृतिके जर्गेना कर्ना उद्देश्यसे लम्की चुहा नगरपालिका वडा नं. ४ भल्का बजार गुरही चोकमे गुरही असरैना सांस्कृतिक कार्यक्रम हुइल बा ।
धनगढीके कन्द्री गाउँ, फुलवारीमे औपचारिक कार्यक्रम कैके गुरही टिहुवार मनाइल बा । कैलालीके बर्दगोरिया गाउँपालिका वडा नम्बर ६ पुथ्वीपुर, गुरही चोकमे श्री जनजागरण यूवा क्लवके आयोजना तथा कैलाली इभेन्ट एण्ड मिडिया नेटवर्क प्रालिके सहआयोजनामे गुरही अस्रैना तथा सांस्कृतिक कार्यक्रम कैगिल बा । कैलाली जिल्लामे स्थापित हुसेकल गुरही कार्यक्रम काठमाण्डौ प्रज्ञा प्रतिस्थान ओ बाँके, बर्दिया, सुर्खेत ओ दाङ जिल्लामेफे भव्यताके साथ मनागिल बा ।
थारु समुदायसे मनाजैना गुरही टिहुवारके अवसरमे कैलालीके टमान स्थानीय तहमे सावन २५ गते स्थानीय विदा डेले रहे ।
