हसुलिया ३२ सावन । थारु भाषा, कला, संस्कृति ओ साहित्यिक प्रशिक्षण संगे थारु साहित्य सृजना वाचन कार्यक्रम अमौरीमे हुइना कार्यक्रमके सक्कू तयारी पुरा हुइल बात आयोजक जनैले बा ।
मनके आवाज संचालक समिती परिवारके आयोजना ओ जानकी गाउँपालिका वडा नं.-५, वडा कार्यालय अमौरीके सहयोगमे यहे अइना भाडो २ गते उक्त कार्यक्रम हुईना हुइल बा । थारु भाषा, कला, संस्कृति, साहित्य संरक्षण-प्रबर्द्धन ओ बिकृटी, कुसंस्कारहिन न्यूनीकरण कर्ना उद्देश्यले यी कार्यक्रम हुई लागल बात मनके आवाज संचालक समिती परिवार,नेपालके अध्यक्ष सुरज चौधरी “अखेल” बटैलै ।
अस्टके यी कार्यक्रम बिसेस कर्के लावा व पुरान साहित्यकारहुकनके मैगर सम्बन्ध बनैना, अन्तरक्रियाके निस्कर्षमे आइलअनुसार साहित्यिक पैला आघे बर्हैना, संयुक्त ग़ज़ल, मुक्तक छपाईके लाग लेख, रचना संकलन करना, लावा व पुरान साहित्यकारहुकनहे सम्मान करना व थारू साहित्यहे उचाईमे लन्ना फेन उद्देश्य रहल बात मनके आवाज कार्यक्रम संचालक टोहार प्यारा जानकारी करैले।
यि कोरोनाके भयावह अवस्थामें विशेष सावधानीके साथ यि कार्यक्रम ढारगिल बा । साहित्यकारहुकनके साहित्यके उच्च कदर कर्ती उचित सम्मान-पत्र, प्रमाण-पत्रके व्यवस्था फे करगिल ओ ओकर संगसंगे हाँस्य कलाकार सत्यनाराण फेतारा लगायतके तमाम हाँस्य कलाकारके प्रस्तुती फे रहने बा। लौवा पुरान गितबाँसके झलक फे देख मिल्ना आयोजक जनैले बा।
