कविता: टुँहार पहिचान का हो

सुरज अखेल
राजापुर न.पा.२ बरगदही, बर्दिया
हाल : सुर्खेत
बुझे नि सेकल हुँ
टुँहार पहिचान का हो
झुम्रा ढमार मागर छोर्के
आढुनिक साँगिटीक क्षेत्रमे लग्लो
उम्मे फेन चित्त निबुझ्के
राजनितिकमे पाइला टेक्लो

कबु काँग्रेसके डुवार ढक्ढकैलो
कबु ने का पा माओवादीके डुवार ढक्ढकैलो
कबु एमालेके डुवार ढक्ढकैलो
लुग्गा फेरे हस टुँ पार्टी फेर्टी बाटो

कबु भेगुवा अँगुच्छा
कबु ट डउरा सुरवार
मै हुँ थारु
मै हुँ बाहुन
मै हुँ क्षेत्री कहटी नेग्ठो
जाटसे लेके ठहर टक मेर मेराइक बटिठो

अट्राले फे टुहार चित्त निबुझल
राजढानि काठमाडौं शहर छिर्लो
बालुवाटारमे प्रबेश कर्लो
देश चलुइया अगुवा बन्लो
बन्ना ट बन्लो
लेकिन देश बेचुइया देश द्रोर्हि ठहर्लो
कबु इन्दियाहे ट कबु अमेरिका हे देश बेच्लो
मै बुझे निसेक्नु
टुँ नेपाली की,की इन्दिया की,की अमेरिकन
मै बुझे निसेक्नु टुँहार पहिचान
टुँहि बटाउ
टुँहार पहिचान का हो ।
…..